Ena ika23 ni Me 2024, e vakadonui e Kazakhstan na nona vakatulewataka e dua me tawaveitovaki ena veika vakaivalu ni yavutaka qori ena nona vakabauta vakalotu. E vakatulewataki qori ni oti nona veilewai o Brother Daniil Smal e yabaki 20. E tukuna na turaganilewa ni “veivakurabuitaki” na vakatulewa qori.

Ena ika17 ni Me 2023, a tukuni vei Daniil me rairai ina valenivolavola ni mataivalu. E vakamacalataka ena veidokai na nona vakabauta. E vakaraitaka tale ga vei ratou na vakailesilesi ni mataivalu, e dua na ivola e vakadonui kina vakalawa me kua ni vakaitavi ena ka vakaivalu o Daniil ena vuku ni nona vakabauta. Ia e sega ni vakadonui, ratou vakacurumi koya ga ena mataivalu. Ena siga e tarava, e vakavodoki vakaukaua ena sitimanivanua me kau ena keba ni mataivalu e rauta ni 2,000 na kilomita na kena yawa mai na nona itikotiko ena tauni o Rudny. Ena gauna dredre qori e yalodina tu ga ena nona tawaveitovaki qai dau veidokai, e sega ni cavuta na bubului ni mataivalu, e sega ni dara na isulu ni valu se vakaitavi ena vakaukauayago ni mataivalu. E vakalewena e vica vata na fomu me vakaraitaka kina nona sega ni duavata ena ka e vakayacori tiko vua. Ia ni sega tiko ga ni vakadonui nona kerekere, sa qai saga na veivuke ni tabana vakalawa. E tolu na vula na kena rogoci tiko ena mataveilewai.

Ena ika9 ni Noveba 2023, e vakatauca na mataveilewai na Military Court of the Almaty Garrison na nona vakatulewa ni sega ni dodonu vakalawa na nona vakacurumi ena mataivalu o Daniil. Qo na ka e vakatulewataka na mataveilewai: “Na nona vakaukauataki o [Daniil] me curu ina mataivalu, e veisaqasaqa kei na nona vakabauta vakalotu, e vakatabui kina me vakaitavi ena mataivalu qai sega ni dokai na nona galala ni vakatulewa kei na nona vakabauta vakalotu.” E vakatulewataka tale ga na mataveilewai me sereki o Daniil mai na keba ni mataivalu a curu tiko kina me ono na vula.

Ni oti toka ga vakalailai na vakatulewa qori, e kerea na mataivalu me rogoci tale. Ia ena ika16 ni Epereli 2024, na mataveilewai levu duadua ni mataivalu na Military Court of the Republic of Kazakhstan, e tokona na vakatulewa ni mataveilewai e ra. Na vakatulewa vakairogorogo qori e vakadonui ena ika23 ni Me 2024, qai yavutaki ena lawa e vuravura raraba kei na yavu ni vakavulewa e Kazakhstan, e doka na nodra galala ni vakatulewa na lewenivanua. E vakamatatataka sara ga na mataveilewai: “Sega sara ga na dodonu vua na matanitu me vakaukauataka e dua me cakava na ka e veisaqasaqa kei na nona lewaeloma.”

Qo na imatai ni gauna ena mataveilewai e Kazakhstan me sega ni saqata nona dodonu e dua me tawaveitovaki ena ka vakaivalu ni yavutaka nona vakatulewa ena nona vakabauta. E kaya o Brother Lev Gladyshev, na nodra mata na iVakadinadina i Jiova e Kazakhstan: “Keimami marau ni doka na mataveilewai na nona dodonu vakalawa o Daniil me tawaveitovaki ena ka vakaivalu. E bibi dina na vakatulewa qori ni na rawa ni vakayagataki ena gauna se bera mai me taqomaki na nodra dodonu na tamata yadua e Kazakhstan kei Esia e Loma.”​—⁠1 Timoci 2:​1, 2.