E yavala totolo na Komiti e Valataka Nodra Dodonu na Lewenivanua ena Matabose kei Vuravura na UN Human Rights Committee ena dua na kerekere ena ika3 ni Janueri, 2018, me baleti Teymur Akhmedov. E vesu vakatawadodonu o Akhmedov me voleka ni dua na yabaki. Sa yabaki 61, e tautauvimate tale ga. A kerekere tale ina mataveilewai e Kazakhstan, ia mani sega ni vakadonui. E dei toka ga na mataveilewai ena ka e vesuki koya kina, oya ni beca na lawa ena nona vakaitavi ena veika vakalotu, e kere veivuke gona ina Komiti e valataka na dodonu ni lewenivanua o Akhmedov me vukei koya.

Ena dua na veivosaki ena ika9 ni Janueri 2018, e vakaroti Kazakhstan na Komiti qori me kauaitaka nona bula o Akhmedov, ni se bera ni rogoci tiko na nona kerekere. E tukuna na Komiti ni dodonu me “yavala totolo sara ga” na matanitu “me kua tale ni lokuyara ena nona qaravi vakavuniwai o [Akhmedov], me dikevi tale ga na kena ituvaki e valeniveivesu me salavata kei na veidinadinati me baleta nodra dodonu na lewenivanua kei na veika vakapolitiki e kilai me [International Covenant on Civil and Political Rights], me raica tale ga me tautauvata kei na ivakatagedegede e taurivaki e vuravura raraba.” E tukuni ena veivosaki qori ni rawa ni “sereki koya mai valeniveivesu” na matanitu “ni tautauvimate, se me vakaroti koya me kua ni biuta nona vale ni se bera tiko ni dikeva na Komiti na veika me baleta nona kisi.”

Na ka e tukuni qori me kauaitaki na bula i Akhmedov e vakavotui sara ga kina na rai ni ilawalawa ni Matabose kei Vuravura e valataka na nodra vesu tu vakatawadodonu eso, qo na UN Working Group on Arbitrary Detention. Ena Okotova ni 2017, e dikeva na isoqosoqo qo na kerekere me baleti Akhmedov, qai raica ni a vesu vakatawadodonu, me sereki koya na matanitu, me saumi koya tale ga ena vuku ni veika tawadodonu e cakava vua. Ia me yacova mai qo e sega ni bau kauai na matanitu o Kazakhstan ni vakacala na isoqosoqo qori na ka e cakava tiko. E totogi me yabaki lima e valeniveivesu o Akhmedov, ia sa oti qo e voleka ni dua na yabaki nona vesu tu.