ALMATY, Kazakhstan—Ena ika2 ni Me 2017, e vakatulewataka e dua na mataveilewai e Astana, na koroturaga kei Kazakhstan, me yabaki lima e valeniveivesu o Teymur Akhmedov ena nona veivakavulici ena iVolatabu, ia e vakamacalataka na mataveilewai ni “uqeta na veisei ni lotu,” e “uqeta” tale ga “mera cibitaka [nodra lotu].” Me ikuri ni nona curu e valeniveivesu, e vakatabuya o turaganilewa me kua tale ni veivakavulici ena iVolatabu o Akhmedov me tolu na yabaki. E leqataki na kena ituvaki ni sa yabaki 61, e ulunivuvale, e tolu tale ga na luvena tagane. E vinakati me qaravi vakavuniwai ni tauvi koya tiko e dua na mate levu, ia e sega ni vakatarai. Ena kerea o Akhmedov me rogoci tale na kisi. Ena rawa ni vakayacori ena icavacava ni vula o Me se itekitekivu ni June.

Na vakatulewa qo e vakavu kauai ni vesuki Akhmedov na Komiti ni Tabana ni Veitaqomaki e Kazakhstan ena ika18 ni Janueri 2017, qai beitaki koya ena Tikina 174(2) ni Lawa ni Basulawa e Kazakhstan. A vesu me wawa veilewai tiko me vica na vula, ia e sega ni vakatarai me qaravi vakavuniwai. E kaya o David A. Semonian, na mata ena itikotiko liu ni iVakadinadina i Jiova: “Keimami leqataki Teymur vakalevu na iVakadinadina i Jiova e veiyasa i vuravura. Keimami vakanuinui tu nira na bokoca na vakailesilesi na ka e beitaki kina ni sega na kena ivakadinadina vinaka, ni lotu vaKarisito dau muria na lawa. Mera vakasukai koya me lai sotavi ratou tale na nona vuvale, me qaravi tale ga vakavuniwai ena kena gauna totolo.”

Era raica na iVakadinadina i Jiova na vakatulewa ni mataveilewai e Astana ni sa muria tiko o Kazakhstan na ivakarau ni nodra vakacacana na lotu mai Rusia, vakabibi na lewa se qai tauca ga qo na Mataveilewai Cecere e Rusia me sogo na Valenivolavola ni iVakadinadina i Jiova e kea. E kaya o Semonian: “Me vaka ga na ka e vakayacori ena neimami sokalou e Rusia, sa vaka me lewai o Teymur Akhmedov ena lawa e vauci ira na batikadi, ia e vakayagataki vakatani ena neimami sokalou. Era vakamamasu na isoqosoqo mai na veiyasa i vuravura, wili kina na komiti e valataka nodra dodonu na lewenivanua na United Nations Human Rights Committee kei na matabose e raica na galala ni lotu e veiyasa i vuravura na United States Commission vei Kazakhstan me kua ni vakayagataka vakatani na lawa qori me vakacacana kina na sokalou ena duavata.” E tinia: “Keimami nanumi ira kece na taci keimami e Kazakhstan, keimami vakanuinui ni na sega tale ni vaqaqai nodra veivakavulici ena iVolatabu ni sa vakadinadinataki na kena yaga ena veitikotiko e veiyasa i vuravura. Keimami na via kila sara ga na macala ni kisi qo.”

Gusunivosa:

Veiyasa i vuravura: David A. Semonian, Valenivolavola ni iTukutuku, +1-845-524-3000

Kazakhstan: Bekzat Smagulov, +7-747-671-45-01