OKOTOVA 28, 2022
KENADA
Sa Tara Oti e Dua na Vale ni Soqoni e Kenada
Sa tara na imatai ni Vale ni Soqoni ena ivavakoso e Iqaluit e Nunavut, e Kenada. Ena ika14 ni Okotova 2022, e mai vakacavari na kena tara qai 50 na kena idabedabe. E toka na Vale ni Soqoni vou qori ena vualiku kei Kenada. Ena 2010, e tauyavu kina na ivavakoso e Iqaluit, qai dau caka na soqoni ena vanua ni vakaukauayago ena dua na koronivuli.
Vakasoburi tiko na iyaya ni sa di na mati
Sa bau dredre dina na kena tara, e cegu tale tu ga na cakacaka ena vuku ni matedewa. Na vosa Iqaluit, e kena ibalebale “vanua e levu kina na ika,” qai toka ena toba kei Frobisher ena yanuyanu o Baffin. E rawa ga nida gole e kea nida vodo waqavuka se waqa. E sega ni rawa tale ga ni voli e kea na iyaya ni taravale, na vinakati gona me vakavodoki ena waqa qai kau ena vanua ni tarataravaki. E vinakati tale ga me caka na Vale ni Soqoni ena vula o Okosita ina Okotova ena vuku ni draki.
Era marau na tacida mera veivuke
E kumuni qai vakarautaki e 140 na tani na iyaya ni taravale ena Vale ni Soqoni Lelevu e Ontario. Oti e vakavodoki ena 12 na konteina kei na 3 na kisi lelevu, qai kau ina wavu volekati Montreal, e Quebec. Sa qai biu ena waqa me takosova na St. Lawrence Seaway, gole sara ena Wasa na Atalanitika me yacova yani na toba e Frobisher. E sega na wavu me kele kina na waqa lelevu ena toba qori, sa qai vakavodoki na konteina ena dua na mataqali waqa dau usa iyaya (barge). Sa qai tiko e dua tale na waqa me biliga na barge ina vanua mamatia. Ni di na mati, sa ra na qai kauta na iyaya i vanua.
E tara na Vale ni Soqoni me ganita na veiveisau ni draki e Iqaluit. Eso na gauna ena vulaililiwa e dau sivia sara ga na batabata ni draki.
E rauta ni le 40 na tacida mai na ono na yasana era gole mera lai veivuke ena tarataravaki qo. Dua vei ira qori o Brother Jason McGregor, e kaya: “Keimami vakadinadinataka sara ga na veivuke i Jiova me tekivu mai na gauna e vakau mai kina na iyaya, na dredre e sotavi kina, kei na kena wali na ituvaki tawanamaki. Io, sa bau veivakayaloqaqataki dina ni keimami raica na toso ni cakacaka e veisiga.”
Eda marautaka vata kei ira na tacida e Kenada na nodra Vale ni Soqoni vou e toka ena “vanua e levu kina na ika.” Ra qai tomana tiko nodra cakacaka bibi mera “gonedau ni tamata.”—Maciu 4:19.
