Me baleta na kisi ni veilewai na Highwood Congregation of Jehovah’s Witnesses (Judicial Committee) v. Wall, e vakatulewataka kina na Mataveilewai Cecere e Kenada ena ika31 ni Me, 2018, ni sa “soli vei ira na veimatalotu na dodonu mera digia na lewe ni nodra lotu kei na lawa mera muria.” E vakaraitaka gona na mataveilewai ni sega ni dodonu me siova na ituvatuva ni veivakasivoi.

E dikeva na Mataveilewai ni ituvatuva ni nodra vaqaqa na cala bibi na iVakadinadina i Jiova e “sega ni tonotonomata, ia me vukei koya ga e cala bibi me lewe tale ni iVavakoso.” E kaya kina ni na sega ni rawa ni vakatulewa na mataveilewai ena ka e sega ni dodonu me kila oya na veika vakalotu.

E vakamacala na Turaganilewa ni Mataveilewai Cecere o Malcolm Rowe ena vukudratou e ciwa na turaganilewa ena vakatulewa qori. E kaya: “Na ituvatuva kei na lawa ena veimatalotu e rawa ni okati kina na vakadewataki ni ivakavuvuli vakalotu me vaka na kisi qo. E sega na dodonu se na kila ina mataveilewai me vakatulewa ena tikina qo.”

E kaya na daunivakasala ni iVakadinadina i Jiova o Philip Brumley: “E duavata ena vakatulewa qo na Mataveilewai Cecere e Kenada kei na mataveilewai cecere e Argentina, Brazil, Hungary, Ailadi, Itali, Peru, Poladi, kei Merika. Era kila ni noda dodonu vakalawa na kena muri na ivakavuvuli vakaivolatabu me qai rawa kina vua e dua me iVakadinadina i Jiova.”—1 Korinica 5:11; 2 Joni 9-11.