Ena ika4 ni Maji 2022, ratou solia e dua na ivakaro na Tabana ni Vuli e Kenya me taqomaki kina na nodra dodonu ni sokalou na gonevuli. Ratou nuitaka ni na taqomaki tale ga kina na nodra dodonu na gonevuli era iVakadinadina i Jiova, ni sa vica vata qo na yabaki na nodra dau vakaduiduitaki vakalevu.

Ena 2015, e le 36 na gone iVakadinadina i Jiova era vakatalai tani, se ra vakacegui mai koronivuli nira sega ni via vakaitavi ena soqo vakalotu e koronivuli. Ena 2018, ratou bose vata na tacida ena valenivolavola ni tabana e Nairobi, kei ratou na vakailesilesi ni tabana ni vuli me ratou veivosakitaka na veivakaduiduitaki qori. Kena ivakaraitaki, ena ika23 ni Okotova 2018, ratou bose vata eso na tacida kei Dr. Amina Mohamed na vunivola tudei ni tabana ni vuli.

E kaya na Tabana ni Vuli ni so na “vakailesilesi kei na manidia” ni koronivuli e Kenya, “era vakayagataka tiko na iulubale lasulasu mera vakatalai ira kina na gonevuli mai koronivuli.” E vakamacalataka tale ga “ni so, . . . na koronivuli era beca tiko na nodra dodonu ni sokalou na gonevuli, ra qai vakayagataka na lotu me vakaleqa na nodra vuli na gone.”

E tabaki vakalevu na ivakaro qori ena tabana ni itukutuku e Kenya. E kaya tale ga na tabana ni itukutuku ni “sega ni muri na lawa, veidinadinati ni matanitu, vakabibi na yavu ni vakavulewa e Kenya, . . . ena kena beci na dodonu ni sokalou.” E sega ni rawa gona ni tukuni vei ira na gone iVakadinadina i Jiova mera “cakava e dua na ka e sega ni salavata kei na nodra vakabauta.” Era vakaroti tale ga na koronivuli kece mera muria na veidusimaki qori.

Dua na tacida goneyalewa o Kimberly Nyang’ate, e yabaki 17. E kaya: “Rau dau kacivi wasoma na noqu itubutubu e koronivuli niu sega ni via vakaitavi ena soqo ni lotu. Ia au marautaka na veidusimaki e soli qo, ena tokona na neimami tutaka neimami vakabauta.”

Eda marautaka na ivakaro era sa biuta qori na vakailesilesi ena Tabana ni Vuli. Ena vukei ira na luveda e Kenya mera dei tiko ga ena nodra vakabauta.—1 Korinica 15:58.