Ena ika12 ni Me 2023, e tauca na mataveilewai na Court of Appeal e Kenya na lewa ena tokona nodra galala ni sokalou na gonevuli. E tiko e Kenya na lawa me kua ni vakaukauataki e dua me vakaitavi ena ivakarau ni sokalou e sega ni salavata kei na nona vakabauta. Ia me tekivu ena 2015, era sa vakatalai mai koronivuli e 41 na gone iVakadinadina i Jiova nira sega ni vakaitavi ena lotu cokovata.

E okati ena lewa e tauca na mataveilewai na ka e yaco ena 2017. Ratou vakaraitaka ena veidokai e ciwa na tacida gone ni ratou na sega ni vakaitavi ena lotu cokovata. Ratou mani veilewaitaki. Ena 2019, e kaya na mataveilewai e ra ni donu na nodra vakaukauataki na gonevuli mera vakaitavi ena veika vakalotu. Ia ena ika12 ni Me 2023, e kaya na mataveilewai e cake ni “beca na mataveilewai e ra na nodra dodonu na gonevuli mera vuli ra qai sega tale ga ni dokai.” E tukuni tale ga ni nodra vakaukauataki na iVakadinadina i Jiova mera vakaitavi ena soqo ni lotu e “sega ni salavata kei na yavu ni vakavulewa, era vakaduiduitaki qai sega ni dodonu.” E vola e dua vei ratou na turaganilewa: “Era na rawa ni vakayagataka na lewa e tauca na mataveilewai na koronivuli mera taqomaka kina na nodra dodonu na gonevuli.”

Na lewa e tau qo e tokona nona veidusimaki na Minisitiri ni Vuli e Kenya ena Maji 2022. Oya nira vakaroti na vakailesilesi ni koronivuli kece mera doka na nodra dodonu ni sokalou na gonevuli. E tautauvata na ka e yaco qo e Kenya kei na so tale na matanitu e Aferika, me vakataki Malawi kei Rwanda. Qori ni tau na lewa me taqomaka na nodra dodonu na gone iVakadinadina i Jiova.

Mera nuidei na tacida gone e Kenya kei na veiyasa i vuravura ni vakamarautaki Jiova na nodra yaloqaqa mera tokona na sokalou savasava!—Vosa Vakaibalebale 29:25.