Ena 80 na yabaki sa oti, e kau vakavesu o Minos Kokkinakis ena yanuyanu o Amorgós, e Kirisi, me tu kina me 13 na vula. E sega ni veilewaitaki o Brother Kokkinakis, ia e beitaka na mataveilewai e Kirisi ni beca e dua na lawa vou e vakatabui kina na vunau. E imatai ni tacida me vesu ni beca na lawa. Ia ena 1938 ina 1992 e rauta nira le 19,147 na tacida era vesu, nira beca na lawa e vakarota na iliuliu dauveivakararawataki o Ioannis Metaxas. E vica vata na yabaki nodra vosota tu na tacida e Kirisi nodra mokulaki, vesu, ra qai totogitaki e valeniveivesu nira vunautaka tiko na itukutuku vinaka.

Ni yabaki 30, sa tekivu valataka o Brother Kokkinakis me 50 na yabaki, nona dodonu me vunautaka nona vakabauta. E sivia e 60 na gauna e vesu kina, qai vesu me ono na yabaki e valeniveivesu kei na veiyanuyanu. E levu na veika ca e sotava kina, kei ira na tacida era vesu tale ga. Na iotioti ni gauna e vesu kina ni sa yabaki 77. E kaya ina mataveilewai ni sega ni dodonu nona vesu, ia e sega ni duavata kei koya na mataveilewai. E mani kauta nona kisi ina Mataveilewai Cecere e Kirisi. Oti e kerekere sara ina Mataveilewai na European Court of Human Rights, e vakamacalataka kina ni vakatabuya o Kirisi nona dodonu ni sokalou. Ena 1993, e qai vakadonui nona kerekere ni sa yabaki 84. E imatai tale ga ni gauna me veilewaitaka kina na ECHR e dua na vanua e sega ni doka na galala ni sokalou. a Na yabaki 2018 gona, e ika25 ni yabaki me vakananumi kina na vakatulewa vakairogorogo qori. E kaya e dua na parofesa ni lawa e kovuti vuravura me baleti ira na lewenivanua, ni nona veilewai o Kokkinakis “e cavuti vakalevu ena vakatulewa ni ECHR ena veika e vauca na galala ni sokalou, se nona vakabauta e dua.”

Na vakatulewa me baleti Kokkinakis e tauyavutaki kina e dua na lawa e rawa ni vakayagataki ena gauna era saga kina e levu na matanitu kaukaua me vakataki Rusia, me vakatabui nodra dodonu ni sokalou na tacida.

Nona vakabauta kei na nona gumatua o Brother Kokkinakis ena cakacaka vakaitalatala, e ivakaraitaki vinaka vei ira na tacida era tusaqati ena nodra cakacaka vakavunau. Na nona yalodina era kila kina e levu nona vakabauta me yacova mai nikua.—Roma 1:8.