Na ika25 ni Me 2023, e sa ika30 ni yabaki ni nona tauca na Mataveilewai ni Dodonu ni Lewenivanua e Urope (ECHR), e dua na lewa vakairogorogo. Na kisi ni veilewai na Kokkinakis v. Greece, e imatai ni gauna me kaya na ECHR ina dua na matanitu ni sa beca na nona dodonu e dua lewenivanua me sokalou. Me tekivu ena 1993, e dau vakayagataki na lewa qori me taqomaka na dodonu ni sokalou ena 46 na vanua e lewena na Council of Europe. Era saga eso na matanitu mera kauta laivi na noda dodonu meda veisautaka na nodra vakabauta eso tale ena vanua me vakataki Rusia. Ia e dau vakayagataka na ECHR na kisi ni veilewai na Kokkinakis me tauca kina nona lewa.

Me yacova mai nikua, e volai ena website ni Council of Europe na kisi ni veilewai na Kokkinakis. E okata na kisi qori ni vakamacalataka na sala e taqomaka kina na nodra dodonu na lewenivanua na veidinadinati na European Convention on Human Rights. E vakavulici tale ga na kisi qo ena nodra koronivuli na loya qai dau cavuti ni rogoci na kisi ni veilewai ena Mataveilewai e Urope.

E okati ena lewa e tau ena kisi na Kokkinakis na “noda vakaraitaka noda vakabauta ena ka eda tukuna se cakava, qori e vauci ena noda sokalou.” E tukuna tale ga nida na “vakaraitaka na noda galala ni vakabauta nida uqeta eso tale ena noda ‘veivakavulici.’”

E dua vei ratou na ciwa na turaganilewa e vakaitavi ena kisi ni veilewai na Kokkinakis o Turaganilewa De Meyer. E kaya: “Na noda saga meda veisautaka na nodra vakabauta eso tale e vakaraitaka nida ‘gugumatua ni wasea noda vakabauta,’ me kua vakadua ni okati qori me basulawa. E donu sara tu ga na noda tusanaka na ka eda vakabauta.’”

E tau na lewa vakairogorogo me baleti Brother Minos Kokkinakis ni oti e 50 na yabaki na rogoci tiko ni nona kisi. Era vesuki Minos na vakailesilesi e Kirisi ena 1938. Era beitaki koya ni beca na lawa e bulia na iliuliu voravora e Kirisi o Ioannis, ya ni veisautaka nodra vakabauta eso tale.” E se qai yabaki 30 o Minos, e imatai tale ga me vesu ni beca na lawa vou qori. Era vesu tale ga na le 19,147 na tacida ena 1938 ina 1992. E vica vata na yabaki nodra vosota tu na tacida e Kirisi nodra mokulaki, vesu, ra qai totogitaki e valeniveivesu.

Ia e sega ni soro o Minos qai vunau tiko ga. E sivia e 60 na gauna e vesu kina qai rairai vaka18 ina mataveilewai. E tu e valeniveivesu me sivia na ono na yabaki qai totogitaki me sauma e dua na ilavo levu.

Ena 1993, e talaca na nona kisi na ECHR. E yabaki 84 ena gauna qori o Minos, e kaya na mataveilewai ni beca o Kirisi na dodonu ni nona sokalou. E kaya na ECHR me saumi vakailavo vei Minos na balavu ni gauna a vakacacani tu kina, wili tale ga kina na sau ni veilewai. E lai vakaitikotiko ena yanuyanu o Crete ena vo ni nona bula, me yacova nona takali ena 1999 ni sa yabaki 90.

E vakadeitaka o Turaganilewa De Meyer ni sega ni daubasulawa o Minos, ia “e beitaki vakailasu ga ena levu ni nona gugumatua.”

E vakamacalataka na noda loya na iVakadinadina i Jiova o Philip Brumley, na yaga ni kisi ni veilewai na Kokkinakis. E kaya: “E vakadeitaki ena kisi ya na noda dodonu ni wasea vei ira eso tale na noda vakabauta. E dau cavuta vakalevu na ECHR ni valataka na dodonu ni sokalou. Ena taudaku mada ga kei Urope.”

Eda vakavinavinakataki Jiova ena nona veivuke ena kisi ni veilewai na Kokkinakis. E yaga tiko ga na kena lewa me yacova mai nikua. Eda vakavinavinakataka na nona vuku, kei na nona veidusimaki nida saga me “taqomaki na itukutuku vinaka qai tauyavutaki vakalawa.”—Filipai 1:7.