Era na vakananuma na iVakadinadina i Jiova e Kirisi e rua na ka bibi ena 2022: sa oti qo e100 na yabaki mai na imatai ni gauna e sega kina ni via curu e dua na tacida tagane ina mataivalu. Kena ikarua, qo na ika25 ni yabaki ni kena vakarautaki na cakacaka me isosomi ni curu ina mataivalu.

Ena veiyabaki ni 1900, e yaco vakalevu e Kirisi na veileti vakamataivalu. E vakatovolei gona na nodra tawaveitovaki na tacida. O Brother Nikos Abatzis kei Brother Nikolaos Rebebos, rau imatai ni iVakadindina i Jiova (e kilai ena gauna ya me Gonevuli ni iVolatabu) e Kirisi me rau sega ni via vakaitavi ena ivalu ena vuku ni nodrau vakabauta.

E sega ni via vakaitavi o Brother Abatzis ena gauna rau veivaluvaluti kina o Kirisi kei Taki, ena 1919 ina 1922. E vakamacalataka: “E vakaroti meu gole ina keba ni mataivalu [e Esia Lailai] . . . Au yaloqaqa ena gauna qori qai tekivu vunautaka [vei ira na sotia] ni sega ni duavata kei na Kosipeli na ivalu. E tukuni kina meda lomani ira na keda meca.” Ni oti na ivalu, e tomana o Brother Abatzis nona vunautaka na itukutuku vakaivolatabu ena levu na vanua e Kirisi.

E vakaitavi o Nikolaos Rebebos ena gauna rau veivaluvaluti kina o Kirisi kei Taki. Ia e veisau na nona rai me baleta na ivalu ni wilika na iVolatabu kei na tikidua e solia vua e dua na Gonevuli ni iVolatabu. E tukuna vei ira na nona iliuliu ni na sega ni vakaitavi ena valu, dina ga ni na rawa ni lauvana mate. E yaloqaqa o Nikolaos ni kaya ‘ni na sega ni lutu e dua na drauniuluna, ke sega ni vakatara na Kalou.’ Ni oti na ivalu, e vaqarai ira na Gonevuli ni iVolatabu qai papitaiso ena 1925.

E levu na tacida tagane e Kirisi era vakataki Brother Abatzis kei Brother Rebebos. Era tawaveitovaki qai sega ni vakaitavi ena ivalu. Ena gauna ni iKarua ni Valu Levu kei na nodra veivaluvaluti vakataki ira e Kirisi ena 1946 ina1949, levu na tacida tagane era sega ni curu ina mataivalu se ina batikadi. Eso mada ga era tini vakamatei. Era yaloqaqa tiko ga qai vunautaka itukutuku ni veisaututaki ena iVolatabu. E tubu kina na kedra iwiliwili na tacida e Kirisi ena 178 ena 1940 ina 2,808 ena 1949.

Levu na tacida era vesu nira sega ni via curu ina mataivalu. Kedra iwiliwili taucoko na tacida era bala e valeniveivesu ena vuku ni nodra vakabauta e 3,788. Ena 1997, e vakadonui e Kirisi me vakarautaki e dua na cakacaka me isosomi ni curu ina mataivalu. Era vakaitavi ena cakacaka qori e rauta ni 100 na tacida.

Ena yabaki vakacakacaka ni 2022, e rawati e Kirisi e dua na iwiliwili levu duadua ni dautukutuku e 27,995 qai ra papitaiso e 420.

E vakadinadinataki ena 100 na yabaki sa oti, ni o Jiova e tokoni ira tiko na tacida e Kirisi ena nodra dei mera sega tale ni vulica na ivalu.—Aisea 2:4.