Ena ika10 ni June 2023, e sevutaka o Brother Geoffrey Jackson, e lewe ni iLawalawa Dauvakatulewa, na ivola The Bible—The Good News According to Matthew ena vosa vakaRomany (Ceva kei Kirisi). E sevutaki ena dua na soqo ena valenivolavola ni tabana ena siti o Piraeus e Kirisi. Era sema ena Internet e sivia na le 29,000 mai na ivavakoso e Kirisi kei Saipurusi mera sarava na kena porokaramu. Oti ga qori, e vakarautaki me download na kena ilavelave ena iyaya vakalivaliva. Ni oti e vica na vula, ena qai veisoliyaki na kena ilavelave tabaki.

E sega ni dua tu na lawa ni vosa vakaRomany (Ceva kei Kirisi), e dredre gona na kena vakadewataki. Era lewena na kena timi ni vakadewa e tini na tacida era veiqaravi ena valenivolavola ni tabana e Kirisi. Era dau veivuke tale ga eso na tacida era cakacaka ga mai nodra vale.

Ni wilika oti e dua na tacida yalewa na ivola i Maciu e sevutaki vou qo, e kaya: “Au mai kila na yaca i Jiova niu vulica na iVolatabu ena vosa vaKirisi. Dina ga niu kila na veika au wilika se rogoca ena vosa qori, ia e tara sara vakalevu na lomaqu na noqu vosa ni sucu, qai uqeti au meu muria na veika au vulica.”

E kaya tale e dua na tacida yalewa: “E uqeti au vakalevu noqu wilika na Maciu 26:38, 39 ena vosa vakaRomany (Ceva kei Kirisi). E kaya o Jisu vei ratou nona tisaipeli ni ‘vusolo sara ga na lomana, e vaka ga e sa mate.’ Ia e qai kerea vei Jiova ena masu me vakaukauataki koya me cakava na lomana. Ni matata vei au na tikinivolatabu qori, au kila kina ni sega ni cala keu dau yalolailai ena so na gauna. Au vulica tale ga meu dau masu vagumatua vei Jiova me vakaukauataki au meu vosota na ituvaki dredre. Meu dau talaucaka tale ga na lomaqu vei ira na mataveitacini.”

Eda marau vata kei ira na tacida era vosa vakaRomany ni na vukei ira na iloloma talei qo i Jiova mera toro voleka vua.—Jemesa 4:8.