Ratou kudruvaka e le 15 na lewe ni komiti na United Nations Human Rights Committee (CCPR), na nona beca o Kyrgyzstan na nodra dodonu na mataveitacini. E vakatabuya mera vakaitavi na tacida ena nodra sokalou ena tolu na vanua e kea. E vakarautaka na CCPR e dua na ripote e vitu na tabana, qai vakarota na matanitu o Kyrgyzstan me sauma lesu na ka e totogitaki ira kina na tacida, me kua tale ga ni vakacacani se totogitaki ira tiko. Qo sa ikarua ni gauna e kaya kina na CCPR ni sega ni duavata kei na ka e cakava tiko o Kyrgyzstan vei ira na tacida.

Ena 1993, era vakalawataki na imatai ni wasewase ni tacida e Kyrgyzstan, sa qai vakalawataki na vanua taucoko ena 1998. Sa vicasagavulu gona na yabaki na nodra marautaka tiko na mataveitacini na nodra sokalou ena galala e Kyrgyzstan. Sa oti qo e tini na yabaki na nona sega ni vakadonuya na State Committee on Religious Affairs (SCRA) me vakalawataka e tolu na ivavakoso vou e Osh, Naryn, kei Jalal-Abad ena ceva kei Kyrgyzstan. E vakavica na nona sega ni vakadonuya na nodra kerekere na tacida. Na ka e cakava qori na SCRA, e sega ni vakatarai kina vei ira na tacida era tiko ena tolu na vanua qori mera vakaitavi ena nodra sokalou, soqoni kei na soqo lelevu. E vakatabui tale ga mera volia se vakayagataka na Vale ni Soqoni. E kaya gona na CCPR nira vakaduiduitaki na mataveitacini ena vanua qo, nira vakatabui mera vakaitavi ena nodra sokalou.

E vakaroti Kyrgyzstan na CCPR me “kua tale ni qai vakacacani, se totogitaki” ira na tacida. E soli vei Kyrgyzstan e 180 na siga me tukuna ina CCPR na ka sa cakava me muria kina na lewa sa tau qori.

E se sega ni macala tiko era na muria na vakailesilesi e Kyrgyzstan na lewa qo, qai vakatara mera sokalou ena galala na tacida se sega. Ia e dikeva vinaka tiko na ituvaki qori na isoqosoqo e dau valataka na dodonu ni lewenivanua na Forum 18, qai kaya “ni sega ni muria o Kyrgyzstan e dua na lewa a tauca tale ga na UN ena 2019.”

Ke muria se sega o Kyrgyzstan na ka e vakarota na UN, eda lomavakacegu ni kila vinaka tu o Jiova na ka era sotava tiko na tacida. (Same 37:18) Na Tamada dauloloma o Jiova, ena vakalougatataka na nodra yalodina kei na nodra yaloqaqa.—Same 37:28.