Ena itekitekivu ni Maji 2023, era tiko ena dua na soqo ena siti o Riga e Latvia e sivia na le 21,000. E dau vakaraitaki ena soqo qo na veimataqali ivola qai vakatokai na Latvian Book Fair. Qo sa ikavitu ni gauna mera vakaitavi kina na tacida qai imatai ni gauna ni oti na matedewa na COVID-19. Era marau mera vakaraitaka na New World Translation of the Holy Scriptures ena vosa vakaLatvia e sevutaki ena 2020.

Era kauai e levu na tiko ena soqo ena yaca ni Kalou o Jiova. Era kurabui nira rogoca ni imatai ni iVolatabu vakaLatvia me biu kina na yaca ni Kalou, e tabaki ena 1689. Ia era qoroya tale ga ni vakalesui vaka7,000 ena New World Translation na yaca ni Kalou.

Era taleitaka tale ga na tiko ena soqo eso tale na ka me baleta na New World Translation. E kaya e dua na turaga e cakacaka ena vanua ni tabaivola, ni qoroya na veika e vakayagataki ena noda iVolatabu. E kaya ni tabaki me rawa ni vakayagataki ena veisiga.

E soli vua e dua na turaga na New World Translation qai kaya ni taleitaka ni vakayagataki kina na vosa e kilai rawarawa qai matata. E liu, e dau dredre vua me wili iVolatabu ni sega ni matata na kena ivakadewa. Ia dua na ka nona marau me wilika kei luvena yalewa na New World Translation. Ni mai cava na soqo siga tolu, e veisoliyaki e sivia na 130 na ilavelave ni New World Translation ena vosa vakaLatvia.

Era marau na tacida era vakaitavi ena soqo qo mera vukei ira eso tale mera vulica e levu na ka me baleta na iVolatabu kei koya e vakavuna. E kaya e dua na tacida yalewa: “Au marau ni vukei ira e dua na iwiliwili levu ni lewenivanua, mera kila na yaca i Jiova ena loma ni tolu ga na siga!”

Era tiko e Latvia e sivia na le 2,100 na dautukutuku. Eda marau ni yaga vei ira na tacida kei ira eso tale era taleitaka na Vosa ni Kalou, na ivakadewa vou ni iVolatabu qo mera toro voleka vei Jiova.—Jemesa 1:17.