Ena ika27 ni Me 2023, e vakatabui na vanua me caka kina na vuli vakalou ena siti o Antananarivo e Madagascar, volekata e dua na Vale ni Soqoni. E vunau o Brother Kenneth Cook, Jr., e lewe ni iLawalawa Dauvakatulewa. Na ulutaga ni nona ivunau na “Vale e Lagiti Kina o Jiova.” E tuvanaki ena siga tarava e dua na soqo lavotaki, qai kaburaki vei ira e sivia na le 45,000.

Me tekivu ena Tiseba 1999, e dau caka na vuli vakalou ena valenivolavola ni tabana e Madagascar. Ia ni toso na gauna sa sega ni veirauti vei ira na mataveitacini era mai vuli. Ena Julai 2020, e voli e dua na qele volekata na valenivolavola ni tabana qai tekivu na tarataravaki. E caka na vakatatabu ni COVID-19, ia ena loma ga ni rua na yabaki e vakaoti na tarataravaki. E tiko kina e rua na tabavale, e dua me caka kina na vuli, na kena ikarua mera vakaicili kina na gonevuli kei na qasenivuli. Ena vakayacori ena vanua qori na vuli ni Koronivuli ni iTalatala ni Matanitu kei na Koronivuli ni iVakatawa ni Tabacakacaka kei na Watidra.

Ni levu tiko ga na vuli vakalou, ena vukei ira vakalevu na tacida mera tu vakarau ni “vakamacalataka na veika vakayalo ena vosa vakayalo.”—1 Korinica 2:13.