Me yacova na yabaki 2023, e sa ika75 ni yabaki ni kena tauyavu na valenivolavola ni tabana ni iVakadinadina i Jiova ena siti o Blantyre e Malawi.

Ni bera qori, e dau tuvanaka na cakacaka e Malawi na valenivolavola ni tabana e Sauca Aferika. Ni tekivu na veiyabaki ni 1930, e tubu na kedra wiliwili na tacida e Malawi mai na 28 ena 1934 ina 5,600 vakacaca ena 1948. E dola gona ena imatai ni Seviteba 1948 na valenivolavola ni tabana ena dua na tabavale lailai e redetaki e Blantyre. E vakayagataki na ofisi qori me yacova ni tara na Peceli vou ena dua na vanua voleka ena 1958.

Ena Okotova 1967, era vakatabuya na vakailesilesi na noda cakacaka e Malawi. E sega gona ni vakayagataki na noda valenivolavola ni tabana. Ia era tuvanaka tiko ga na tacida tagane nuitaki e Malawi na cakacaka vakaitalatala kei na nodra karoni na mataveitacini. E voleka ni 26 na yabaki na nodra tusaqati vakaukaua na tacida e Malawi ena vuku ni nodra tawaveitovaki. Era vesu, mokulaki, eso tale ga era vakamatei. E dua na iwiliwili ni tacida era dro ena veivanua voleka me vakataki Mozambique, Zambia, kei Zimbabwe.

Ena ika12 ni Okosita 1993, e vakatarai tale na noda cakacaka. Ena gauna ni vakatatabu, era dau veivuke na tacida e Zambia ena kena tuvanaki na cakacaka e Malawi. Era cakava tiko qori me rua na yabaki ni oti na vakatatabu. E mani voli e rua na vale ena siti o Lilongwe qai vakayagataki me valenivolavola vou e Malawi. Ena 1994, e vakadonuya na iLawalawa Dauvakatulewa na kena qarai e dua na qele me tara kina na Peceli vou. E vakatabui qori ena ika19 ni Me 2001, ra qai tiko kina e sivia na 2000 na tacida. E levu vei ira qori era tusaqati, ia era yalodina tu me vicasagavulu na yabaki. E dua vei ira qori o Brother Trophim Nsomba, e ivakatawa ni tabacakacaka ena gauna e vakatabui tu kina na noda cakacaka. E kaya o Brother Nsomba: “E vakayaloqaqataki keirau sara ga vakaveiwatini na veivakalougataki i Jiova. E vaka ga na tadra!”

Nikua, sa tiko e Malawi e 1,924 na ivavakoso ra qai veiqaravi kina e sivia ni 109,000 na tacida. Era okati kina na le 225 era veivuke tiko ena valenivolavola ni tabana e Malawi branch. E vakadewataki kina na noda ivola ena vitu na vosa.

Meda masulaka vei Jiova me vakalougatataki ira tiko ga na tacida e Malawi era vakadinadinataka nira italatala ena nodra vosota me vicavata na yabaki.​—2 Korinica 6:4.