Sa rejisitataki na yaca era kilai kina vakalawa na tacida me Jehovah’s Witnesses in Malta (JW-Malta). Ena ika28 ni Tiseba 2021, e soli vei ira na sitivikiti e vakatokai na Certificate of Registration of a Legal Person, a me ivakadinadina ni rejisita.

Ena veiyabaki ni 1970, sa tauyavu na isoqosoqo qo e Melita. Ia vica vata na yabaki nodra sega tu ni vakadonui vakalawa. E dredre gona mera volia eso na itikotiko, se me dola na akaude ni baqe. Ena 1994, era sega ni vakalawataki na International Bible Students Association (IBSA) e Melita. Dina ni tu eso na nodra dodonu na tacida, e vakaiyalayala ga. Ia na nodra vakadonui vakalawa qo, e vakarawarawataka na cakacaka ena nodra ofisi, kei na ivavakoso e Melita.

O Brother Joe Magri, e lewe ni Komiti ni Vanua o Melita. Ni vakasamataka lesu na veika vakalawa qo, e kaya: “E vakayaloqaqataki keimami dina na sala e vakalougatataki keimami kina o Jiova, me keimami vakadonui vakalawa ena vanua qo. E rawati qori ena nodra veitokoni na tacida ena Tabana ni Lawa e Peritania, kei na itikotiko liu. Qo keimami marautaka ni sa rawa ni keimami tokona na cakacaka ni Matanitu ni Kalou, qai vakalagilagi Jiova vakalevu.”

Gauna qo, e sivia e 800 na iVakadinadina i Jiova e Melita ra qai veiqaravi tiko ena 11 na ivavakoso. Eda marautaka ni ‘sega ni dua na ka e tarova’ na ‘vunautaki ni Matanitu ni Kalou,’ a tekivutaka na yapositolo o Paula e Melita ena rauta na 2,000 na yabaki sa oti.—Cakacaka 28:1, 30, 31.