Ena ika17 ni Tiseba 2022, e sevutaka o Brother Louis Breine, e lewe ni Komiti ni Tabana e Varanise, na New World Translation of the Christian Greek Scriptures ena vosa vaCreole ni Mauritius. a E katoni na kena porokaramu ra qai sarava ena Internet e sivia na 2,200. E sa tiko na kena ilavelave tabaki kei na kena ena iyaya vakalivaliva.

E vosataki vakalevu na vosa qo e Mauritius, e tiko na yanuyanu qo ena cevaira ni wasawasa na Indian Ocean. E 2,007 na square kilometer na kena levu qai tiko ena rauta na 800 na kilomita mai na tokalau kei Madagascar. Ena 1933, era gole yani ena yanuyanu qo na tacida mai Sauca Aferika mera vunau. E tauyavu na imatai ni vavakoso ena 1951. E vakayacori na soqoni ena vosa e vakayagataki raraba e Mauritius, na vosa vavalagi.

Ena veigauna sa oti, e se qai vakadewataki ga vakadua na iVolatabu Vakarisi vaKarisito ina vosa vaCreole ni Mauritius. Ia e sega ni volai kina na yaca ni Kalou o Jiova. Ena iVolatabu na New World Translation of the Christian Greek Scriptures, e volai vaka237 na yacai Jiova. E vakayagataki ena iVolatabu vou qo na vosa rawarawa era na kila vinaka na lewenivanua.

E mai cegu tu vakalekaleka na nodra cakacaka na daunivakadewa ena gauna ni matedewa na COVID-19. E kaya e dua vei ratou: “Ni tekivu tale neitou cakacaka, dua na ka na neitou gugumatua. Ni vakatauvatani e liu, e sa qai toso vinaka na neitou cakacaka. Keitou rawa mada ga ni mai vakaotia na vakadewa, ena gauna keitou sa tuvanaka tu. E sega gona ni vakaleqa na cakacaka na matedewa.”

Eda nuidei ni na yaga vakalevu vei ira na mataveitacini na iVolatabu vou qo mera veivolekati kei Jiova qai yalodina tiko ga vua.—Aisea 65:13.