E rogoca o Mike Iwuchukwu ni sa cici sobu ena ikabakaba na luvnena yalewa o Melody, me lai vakasigalevu ni cegu vakalekaleka ena nona kalasi. Oti vakalailai e nanuma me lai raici Melody ke sa kana tiko, se qitora nona iyaya ni vakatatalo. Ia e kurabuitaka na ka e raica, e vakamarautaki koya tale ga.

E kaya o Mike: “E dabe tu o Melody kei na nona laptop, kei na ivola Vuli Mai na iVolatabu. Ratou qai vakarogoci koya tiko e tolu nona lewenikalasi.” E kaya sara vei au: ‘Ta, au caka vuli iVolatabu tiko!’”

Ena vuku ni COVID-19, tekivu ena Seviteba 2020 sa vuli tiko o Melody (online schooling) ena nona koronivuli e Texas mai Merika. E nanuma me tauyavutaka tale ga eso na vuli iVolatabu. E masuti Jiova qai sasagataka sara.

Rau marautaka vakalevu o Mike kei Octavia nona itubutubu o Melody na ka e cakava. E kaya o Mike: “Veigauna kece ena tukuni Jiova tu ga vei ratou nona lewenikalasi. Ia keirau marautaka vakalevu, e uqeti keirau tale ga ni sa vakavulici ratou tiko ena iVolatabu.”

E vakavulici ratou vakawasoma o Melody. E kaya: “Au vakavulica vei ratou na Parataisi, kei na veika me baleti Jisu. Au vinakata me ratou iVakadinadina i Jiova!”

E wasea tale ga nona vakabauta o Samuel Molnar e yabaki ciwa, e Illinois mai Merika.

E uqeti koya nona rogoca nona italanoa e dua na tacida tagane e vunau vua e dua rau tiko veitikivi. E nanuma o Samuel me tovolea tale ga qori. A raica ni qito tiko i tuba e dua na cauravou lailai ratou tiko veitikivi. E tarogi koya o Samuel ke vinakata me rogoca na veika me baleta na Parataisi. A vakadonuya na cauravou qori, mani gole sara o Samuel i nodratou vale lai kauta mai na ivola Noqu iVola ni Talanoa ena iVolatabu.

E kaya o Samuel: “Au kaya vua ni dua na gauna mai qo ena rawa ni qito kei ira na manumanu, era na sega tale ga ni vakamavoataki koya. Au wilika sara vua na italanoa me baleti Taniela nona biu ena qara ni laione.”

E solia tale ga vua o Samuel e dua na ivola e vakamacalataka kina na ulutaga kei na vidio era tu ena jw.org. Rau sa vakadonuya me rau veivosakitaka e dua tale na italanoa vakaivolatabu ena nodrau sota tarava.

E marautaka vakalevu o Samuel na ka e cakava qori, e vinakata tale ga me sauva nona isausau tarava. E kaya: “Au vinakata meu kila na tikidua kece e tiko ena Kato ni Veivakavulici me rawa niu vakayagataka vei ira na tamata.

Tolu na tacida goneyalewa e Houston ratou painia veivuke ni sereki na vuli.

Tekivu ena Okosita, ratou dau veitaratara ena internet (videoconference) me ratou vola ivola o Joselyn Horta e yabaki 13, Melanie Alvarez e yabaki 12, kei Chloe Rodriguez e yabaki 10. Ratou dau tekivu ena vitu na kaloko ena mataka, qai sema vakalima ena dua na macawa.

E kaya o Joselyn: “Keitou na veitalanoa, keitou kana vata tale ga. Veimama ni vitu keitou sa tekivu volavola.” Eso na gauna e dua vei ratou ena yadra bera, rau na qai dau vakauitukutuku vakayalovinaka ena talevoni o rau na rua. Rau na vola: “Yadra! Duri! Cakacaka vakavunau!”

Nodratou gugumatua na goneyalewa qori e uqeti ira nodratou itokani kei na nodratou vuvale. E kaya o Alicia na tinai Joselyn: “Eso na gauna e sega ni lomaqu meu vunau. Ia niu raici Joselyn ni gumatuataka na cakacaka qo, au kaya ga, ‘Au vinakata tale ga meu vunau!’”

Dina ni yaco tiko na matedewa, ia e marau vakalevu o Jiova ni raici ira na itabagone yalodina era cakava tiko na ka era rawata ena cakacaka vakaitalatala.—Vosa Vakaibalebale 27:11.