Ena ika11 ni Feperueri 2024, e caka na sotasota ni qito football (2024 Super Bowl) e Las Vegas mai Nevada, e Merika. Ni vo e dua na macawa me caka na qito era tabili ena yasayasa qori e rauta ni 300,000 na lewenivanua. E tuvanaki sara na cakacaka vakavunau lavotaki ena gauna qori. E vakarautaki na qiqi ni vunau ena 50 na vanua osooso ena siti o Las Vegas Boulevard. E vakarautaki na ivola vakaivolatabu ena ciwa na vosa, qai rauta ni 1,500 na mataveitacini era vakaitavi kina. Qo eso na ivakaraitaki e yaco donuya na gauna qori.

E dua na turaga a lako sivita e dua na qiqi ni vunau e vakaraitaki tu kina na taro, “E Rawa ni Vakabulai na Noda Vuravura?” E totolo ga nona vuki lesu qai golevi rau na tacida rau tiko ena qiqi. E kaya sara vei rau ni leqataka tiko na ituvaki kei vuravura ena gauna qo, ia e marau ni rogoca na vakacegu e yalataka na iVolatabu ena Jeremaia 29:11. E sivia ni dua na aua nodratou veitalanoa tiko. Ni bera ni biubiu, e kaya ni vinakata me gole ena soqoni.

A biu tale ga e dua na qiqi ni vunau volekata na raraniqito. E raica sara ena qiqi e dua na sikiuriti na taro vata ga qori, “E Rawa ni Vakabulai na Noda Vuravura?” Me vaka ni se cakacaka tiko, a kaya vei rau na tacida ni na lesuvi rau tale ni oti nona cakacaka. Oti ga vakalailai, a lesu na sikiuriti qori qai vakamacalataka ni se qai tekivu wilika tiko na iVolatabu. Rau tukuna sara na tacida vua na ituvatuva ni noda caka vuli iVolatabu, e vinakata sara ga o koya me vulica e levu na ka. E tuvanaki sara e dua na tacida me lesuvi koya.

Ni vo e dua na siga me caka na sotasota ni qito, rau vunau na tacida vua e dua na marama. E vakamacalataka sara na marama qori ni raica ena tivi na itukutuku ni noda qiqi ni vunau. E kaya: “Oni cakava tiko e dua na cakacaka vinaka duadua. Na gauna dredre va qo, keimami vinakata sara tu ga na inuinui.” E mani taroga na vanua kei na gauna era dau soqoni kina na tacida ena yasayasa ya.

Eda marau ni levu era vakarorogo ni ‘kaci tiko o vuku,’ ya na noda cakacaka vakavunau lavotaki e matanalevu. Me lagiti duadua ga kina na Kalou o Jiova.​—Vosa Vakaibalebale 1:​20, 21.