Sa taravaki tiko qo e dua na vanua ni sarasara vou ena Watchtower Educational Center e Patterson, Niu Yoka mai Merika. Qo e dua na tabavale levu e rauta ni 2,787 na square meter. E namaki me na oti na tarataravaki ena loma ni yabaki ni 2023. Ena okati ena itikotiko qo, e dua na vale ni iyaya maroroi e tiko kina e va na vanua era na vakaraitaki kina na itaba. E rawa nira lai sarasara kina e veisiga e 1,200 na vulagi. E levu na ka ena itikotiko qo era vakavinakataki ga, ra qai sosomitaki eso na iyaya me vaka na misini e dau vakatakata se vakabatabatataka na vale, wa ni livaliva, kei na paipo. Sa voleka sara tiko ni oti na tarataravaki.

E vakadredretaka nodra cakacaka na tacida na veitauvi ni COVID-19. E dredre me vakau na iyaya ni tarataravaki, qai voleka sara ga ni vakataotaka na cakacaka. Kena ivakaraitaki, e dredre me kau mai na simede ena gauna e caka tiko kina na tarataravaki. Ia era vakaotia rawa na tacida ena kena gauna na caka ni fuloa. Dina ni tubu na isau ni kaukamea sitila, ia e soli vei ira na tacida ena isau vinaka sara nira sa otataka rawa ni bera ni tubu na kena isau.

Ena gauna ni vakatatabu, era cakacaka tiko ga mai ena nodra vale na bolecakacaka ena kena pelenitaki kei na droinitaki ni itikotiko. Dua na gauna, e dredre me ratou sota na tacida kei ira na vakailesilesi ni tauni ena vuku ni vakatatabu ni matedewa, e dredre tale ga na toso ni cakacaka. Ia na nodra cakacaka vata eso na tabana e Peceli, kei ira na vakailesilesi ni matanitu nira videoconference kei na nodra veivuke tale ga na bolecakacaka, e vakadonui kina eso na ka vei ratou na komiti ni tarataravaki.

Na veiveisau ni idusidusi ni vakatatabu e dredre kina mera mai veivuke na bolecakacaka, e vakilai tale ga eso na ka dredre. Ia donuya na Seviteba 2020, sa rawa nira mai veivuke na bolecakacaka, ra tiko tale ga ena vanua ni tarataravaki.

Ena gauna ni matedewa, a sureti o Sister Jennifer Paul me veivuke ena tarataravaki. E kaya me baleta na cakacaka qo: “Au taleitaka na cakacaka. Au marautaka noqu veivuke ena tarataravaki, ia au taleitaka sara vakalevu noqu cakacaka vata kei ira na tacida. Au raica sara ga na toso ni isoqosoqo i Jiova, kei na yaga ni nona veidusimaki.”

Gauna qo, era veivuke tiko ena tarataravaki e Patterson e le 440 na bolecakacaka, kei na 350 na lewenivuvale e Peceli. Era vakadinadinataka na tacida qori, nona vakarautaka o Jiova na ka kece e vinakati me vakaoti kina na tarataravaki.—1 Veigauna 29:16.