Ena ika25 ni Seviteba, 2021, e sevutaki ena iyaya vakalivaliva na ivola vou e kena ulutaga, The Bible—The Gospel According to Matthew ena vosa vakaHmong. A sevutaka qori o Brother Geoffrey Jackson, e lewe ni iLawalawa Dauvakatulewa, ena dua na soqo era sema kina e sivia ni 2,500 na tacida e veiyasa i vuravura.

Qo na imatai ni ivola ni New World Translation of the Holy Scriptures me sevutaki ena vosa vakaHmong. Era vosataka na vosa qo e sivia na 3.9 na milioni na lewe i vuravura. a Era vakabauta na kai Hmong ni dodonu me sokaloutaki na veika buli (animism). Era vakabauta tale ga nira lewa na vuravura na kabula vakayalo era ca kei ira era vinaka, ra qai vakamuai ira na tamata ena nodra kaukaua vuni (shamanism).

Ena veiyabaki ni 1970, era dro e levu na kai Hmong ena keba ni senivalu e Tailadi. Toso na gauna, e vica vei ira qori era sa lai tiko ena veivanua vakavalagi. Levu era toki sara i Merika.

Nikua, e levu na kai Hmong era tiko e California, Minnesota, kei Wisconsin mai Merika. Tekivu mai na 2007, era sa vakadewataka tiko na iVakadinadina i Jiova na ivola vakaivolatabu ena vosa vakaHmong. Ena 2012, e tara e dua na valenivolavola ni vakadewa tu yawa e Sacramento California.

Ratou vakadewataka na timi ni vakadewa na ivola i Maciu ena loma ga ni tolu na vula. Era veitokoni tale ga kina eso na dauwiliwili ena lima na duidui vanua.

Ratou vakila na daunivakadewa eso na veika dredre ni vakadewataki tiko na ivola qo. Gauna e tekivu volai kina na vosa qo ena veiyabaki ni 1950, a sega tu na ituvatuva ni kena volavolai, kei na matanivola lelevu.

A vakadewataki na imatai ni iVolatabu ena vosa vakaHmong ena veiyabaki ni 1980, ia e levu era sega ni rawa ni volia ni rui saulevu. E sega tale ga ni donu eso na kena ivakadewa, e dredre kina ni kilai na iVolatabu. Kena ivakaraitaki, e dua na vakadewa ni iVolatabu e sosomitaka na yaca ni Kalou o Jiova ena dua na yaca ni nodra kalou na kai Hmong.

E kaya e dua na daunivakadewa: “Na New World Translation qo e rawa kina vei ira na yalomalumalumu mera wilika na yaca i Jiova ena nodra ilavelave sara ga, mera nona itokani tale ga. Qo sara ga na ka keimami waraka qai masulaka tu mai ena vicavata na yabaki.”

Era vakavinavinakataka na dauwiliwili na matata kei na kilai rawarawa ni vakadewa ni iVolatabu qo. E kaya e dua vei ira: “Dua na ka noqu qoroqoro ena gauna au wilika kina na ivola i Maciu. Au kaya lo ga, ‘E veiuqeti dina na ka au wilika qo!’ E vaka ga e yaco dina tu na ka au wilika.”

Na sevutaki ni ivola i Maciu vakaHmong e ivakaraitaki uasivi ni noda Kalou e sega ni dau veivakaduiduitaki, e vinakata mera wilika kece na nona vosa o ira na vakasaqarai koya.—Cakacaka 10:34, 35.