Ena ika5 ina ika13 ni Seviteba 1922, e vakayacori e dua na soqo vakairogorogo e Cedar Point, Ohio, e Merika. Qo sa ika100 ni yabaki mai na kena vakayacori na soqo qori. E ciwa na siga ni soqo, ra qai tiko kina na vulagi ena veivanua e Merika, Kenada kei Urope. Kena ivakatautauvata, e rauta nira le 10,000 era tiko ena soqo e veisiga, qai vakadewataki na ivunau ena gauna vata ya ena sivia e 11 na vosa.

E tiko ena itikotiko liu ni iVakadinadina i Jiova e dua na vanua e vakaraitaki kina na italanoa ni soqo qori, kei na ka e rawati ena cakacaka vakavunau. Gauna qo, era rawa ni sarasara ga kina na lewenivuvale e Peceli, ena qai vakadonui vei ira na lewenivanua ni sa tekivu tale na sarasara.

Dua na siga bibi duadua na ika8 ni Seviteba. Era tiko kina e rauta ni le 8,000 ena valenisarasara ena drano voleka na Lake Erie. E vunau kina o Brother Joseph F. Rutherford, e kena ulutaga “The Kingdom” (Na Matanitu).

E 90 na miniti nona ivunau, oti sa qai tarogi ira na vakarorogo ke ra vakabauta ni sa veiliutaki na Karisito. Era doudou nira kaya: “Io!” E kaya sara o Brother Rutherford: “Oni na tukuni koya yani e veivanua. Koya gona, kacivaka, kacivaka, kacivaka.” Ena gauna vata qori, e lutu na ivivi sulu e vesu toka e cake qai volai tu kina: “Kacivaka na Tui kei na Matanitu.”

Qori e uqeti ira sara ga mera gumatua ena vunau. Levu era sa vakaitavi tiko ena cakacaka vakavunau, ia na ivunau qo nei Brother Rutherford e uqeti ira sara ga mera vunau vakalevu ena gauna e caka kina na vunau e veivale. O Sister Ethel Bennecoff e voleka ni yabaki 30 tiko ena gauna ya. Oti na ivunau, e kaya: “Keimami sa qai gumatua ga vakalevu salavata kei na loloma.” O Sister Odessa Tuck e se yabaki 18 ena gauna ya, e kaya: “Au via vakai Aisea, nona tukuna: ‘O yau qo! Moni talai au’”

Oti e rua na siga nona vunau o Brother Rutherford, era tokona na Gonevuli ni iVolatabu e dua na inakinaki, e tukuni kina vakatikina: “Eda vakadeitaka na lotu vaKarisito meda talairawarawa, qai muria na noda Turaga kei na iVakabula o Jisu Karisito. Eda sega ni vakaitavi ena ivalu, vakaduiduile, tikoyavavala se itovo kaukaua. Eda na sega ni lasu, veidabui se vakayagataka na Vosa ni Kalou meda vakacalai ira kina eso tale. Eda vinakata na bula vakacegu.” Na inakinaki qori e vakaduiduitaki ira na Gonevuli ni iVolatabu mai na so tale na lotu era tokona na iMatai ni iValu Levu. Toso na gauna, era cakava tale ga qori ena iKarua ni iValu Levu.

E tukuni ena Vale ni Vakatawa ni ika15 ni June, 1922: “Keimami na cakava na ka kece keimami rawata me keimami nanuma tiko kina na soqo bibi qo. . . . Keimami nuitaka ni na gauna guiguilecavi dredre vei ira na vica vata na udolu era na tiko kina.”

Io, e dua dina na soqo guiguilecavi dredre qori. Me yacova mai qo, e se vakalougatataka tiko ga o Jiova na cakacaka ni kena kacivaki na Tui, kei na nona Matanitu.—Maciu 24:14.