Ena Maji 2020, e mai cegu tu noda sota ena Vale ni Soqoni ena gauna ni soqo ni veiwasewase ena vuku ni matedewa na COVID-19. Ena vakayacori e veiyasa i vuravura ena sivia na 6,000 na soqo ni veiwasewase e kena i usutu “Vakaraitaka na Vosota”! Ena caka ena sivia na 500 na vosa. Na imatai ni vica na soqo ni veiwasewase ena vakayacori ena ika12 ina 14 ni Me, 2023.

O Sister Khrystine Torres e dua vei ira na le 1,800 era tiko ena soqo ni veiwasewase ena Vale ni Soqoni Lelevu e Newburgh, Niu Yoka, Merika. E kaya: “Ni kacivaka o Jeameni: ‘Ni Bula,’ era vakasausau kece na tu e kea. Keimami marautaka kece ni keimami rawa ni mai sota tale”. E tiko tale ga ena soqo qori o Brother Duane Smith, e kaya: “E duatani na ivakarau ni marau keimami vakila. E laurai kina na nodra duavata na mataveitacini.”

E papitaiso o Sister Jessica Dolcemascolo ena gauna ni matedewa, qo sa qai matai ni gauna me tiko kina ena soqo ni veiwasewase ena Vale ni Soqoni. E vakamacalataka: “Na marau kei na loloma au vakila ena gauna ni soqo e vaka ga au sotava e dua noqu itokani dredre sa dede keirau sega ni veirai tu.” O Sister Noemi Tinajero e yabaki 18, se qai papitaiso ga ena tekitekivu ni yabaki qo e kaya: “Ni o raica na nodra veimarautaki na vuvale kei na itokani, e vaka ga ni o sa tu ena vuravura vou.”

Levu era marautaka na usutu ni soqo. E kaya o Brother Sam Huh: “E dau dredre kece vei keda meda vakaraitaka na vosovoso. E veiganiti sara ga ni qori e vukei keda meda vakatotomuria na nona vosovoso o Jiova.” E kaya o Sister Frenchie Smith: “E vukei au na soqo qo meu kila ni bibi na vosovoso, e yaga tale ga ena noqu bula. E veivakayaloqaqataki na porokaramu.”

Qo e dua dina na ka ni veivakalougatataki vei ira era tiko ena imatai ni soqo ni veiwasewase e Newburgh, Niu Yoka! Ena vica na vula mai qo eda rai vakanamata tu kei ira na vica vata na milioni e veiyasa i vuravura meda marautaka na kakana vakayalo sa vakarautaki tu.​—Same 122:1.