Oti na vakacaca ni cagilaba o Dorian ena veiyanuyanu ena Bahamas, e vakacaca tale ga ina tokalau kei Merika. Na cagilaba qori e tiko na kena kaukaua ena ivakatagedegede 5. Ena mataka ni Vakaraubuka na ika6 ni Seviteba, 2019 e tara yani na veivanua me vakataki Cape Hatteras, e Noca Carolina, lai malumu sara na kena kaukaua ina ivakatagedegede 1, era luvu kina e vica na vale kei na vanua ni bisinisi. Ena ika7 ni Seviteba 2019, e vakilai na kena kaukaua e Nova Scotia, e Kenada.

E ripotetaka na valenivolavola ni tabana e Merika, ni dua ga na tacida yalewa e mavoa vei ira na le 1,742 na dautukutuku e Bahamas. E vakacacani e 48 nodra vale na mataveitacini, e 8 tale na vale e vakacacani sara ga vakadua.

Levu na dautukutuku era tiko ena yanuyanu o Great Abaco era tokitaki i Nassau, na koro turaga kei Bahamas. Era veiciqomi na tacida ena gauna era yaco yani kina e raraniwaqavuka.

E tuvanaka sara na Komiti ni Vakacoko kei ira na ivakatawa ni tabacakacaka, mera vukei qai vakatawani vakayalo na tacida. Era gole na tacida mai na valenivolavola ni tabana e Merika mera veivuke ena vakacoko, kei na nodra vakayaloqaqataki vakayalo na lewe ni vavakoso.

E vakacacani eso na vanua ena Noca kei Sauca Carolina, e Merika. E sega ni dua na tacida e vakaleqai, ia era duitutu e sivia e le 737 na tacida, levu vei ira qori era tokitaki ni bera nira lesu ina nodra dui tikotiko. E vakacacani tale ga e 50 vakacaca na vale, kei na 12 na Vale ni Soqoni.

Era sega ni mavoa e dua na tacida e Kenada. Ia e vakacacani eso nodra vale na tacida, boko tale ga na livaliva. Era tu vakarau na mataveitacini ena ivavakoso voleka mera vukei ira na vakaleqai.

Eda vakavinavinakataki Jiova ni dau rogoca nodra “vakamamasu ni kere veivuke” na tacida era nuitaki koya ena gauna dredre qori.—Same 28:6.