Levu na mataveitacini era marautaka nodra vunau nira vola ivola. E laurai ena vica na irogo qo mai Merika ni noda vola ivola e dua na sala vinaka meda tukuna kina vei ira eso tale na inuinui e tu ena iVolatabu.

O Sister Carlee Ruggles e yabaki 13, e vakaitikotiko mai Blue Ash, Ohio. E vakadinadinataka ni yaga vakalevu nona ivola vei ira na lai wilika.

Dua na yakavi a tiko i tuba o Carlee ena gauna a kele yani kina na motopai ena yasa ni nodratou vale. E sobu mai e dua na tagane e tara tu e dua na waqanivola, oti qai kailavaka: “O cei e vakauta mai vei au na ivola qo?” Kila sara ga o Carlee ni ya na ivola a vakauta ena cakacaka vakavunau.

Rau mani cici yani na nona itubutubu, ia e doudou ni kaya o Carlee, “Kemuni, qori o au.”

E kurabuitaka o Carlee kei rau nona itubutubu ni kaya lesu mai na turaga ya, “E lako donu sara ga mai na nomu ivola!” E kaya ni vakacegui koya na veika e wilika ni galili sara tu ga ena gauna ni matedewa. E se qai takali o tacina e vakacegui koya dina na ivola nei Carlee.

E kaya: “Tomana tiko ga nomu volavola. Ke mani saumi mai nomu ivola se sega, na ka o vola ena vakayaloqaqataki ira na lai wilika.”

Gauna qo sa qai doudou ga vakalevu o Carlee me volavola vei ira na tiko veitikivi. E kaya: “Au marau niu kila ni o Jiova e vakayagataki au meu vakayaloqaqataka e dua tale. Na ka eda vola ena rawa sara ga ni uqeta na lomana e dua.”

E veinanuyaka o Sister Myrna Lopez mai Center, Texas, ke dua na tataleitaki ena bau kauai ena nona ivola. Cava e qai yaco? E rogoca sara ni curu i valeniveivesu o vugona. A dau soqoni tu na vugona cauravou qori ena gauna se gone kina. E mani volavola vua o Myrna me vakadeitaka ni se sega ni guilecavi koya o Jiova.

E qai volavola lesu mai o vugona. E kaya ni veilecayaki sara ga ena gauna e vesu kina, vaka sa sega ni vakainaki tu nona bula. E nanuma lesu na gauna se gone kina, e mani tekivu wilika na iVolatabu qai masu vei Jiova. E kaya ni vola nei Myrna e isau sara ga ni nona masu, e vakadeitaka kina ni se kauaitaki koya tiko o Jiova.

E vakauitukutuku e dua na marama vei Sister Natalie Bibbs mai Norcross, Georgia. E kaya ni kunea e bati ni gaunisala na nona ivola ena gauna e tereni tiko kina. E lako sivita na ivola ia e qai lesu tale me lai tomika, e sega ni kila na vuna e cakava kina qori.

E kaya na marama qori vei Natalie: “E sega sara ga ni rawarawa na ka au sotava tiko ena macawa ya, au diva sara tu ga me bau yaco e dua na ka vinaka. Kila na cava, e yaco donu sara ga mai na nomu ivola!’”

E kaya o Natalie: “Na ka e yaco qori e vakanuideitaki au sara ga, au kila kina se iwalewale ni vunau cava eda vakayagataka, o Jiova ena vukei keda.”

E volavola o Sister Laura Martinez mai Athens, Texas, qai solia vei ira na tamata cakacaka ena sitoa e dau volivoli kina. Ena solia na ivola nira kauta mai nona iyaya ena nona motoka. E kaya e dua vei ira ni uqeti koya vakalevu nona ivola o Laura. E mani vola tale vua o Laura e rua na ivola, e sa vuli iVolatabu tale tiko ga ena gauna qo.

Cava eda vulica ena vica na irogo qo? Eda sega ni kila na sala ena “tubu vinaka” kina na itei ni ka dina eda kaburaka. Ia eda nuidei ni o Jiova ena vakayagataka na iwalewale cava ga ni vunau eda muria me vakacegui ira kina na yalomalumalumu, me vakarautaka tale ga vei ira na inuinui.—Dauvunau 11:6.