E vakacaca vakalevu na cagilaba o Michael e Florida ena ika10 ni Okotova 2018. E tete nona ravuravu ina so tale na vanua ena sauca kei Merika. Qo e dua toka na cagilaba kaukaua me ravuti Merika, qai vakacacana e levu na itikotiko e kea. E rauta ni le 18 era mate kina.

E 94 na ivavakoso era tiko kina na mataveitacini, kei na 13 na tabacakacaka e yavalati ira na cagilaba qo. Ia e sega ni dua na tacida e vakaleqai kina nona bula, e le tolu ga ratou mavoa. Na draki ca qo e vakacacana e 528 na nodra vale na tacida, kei na 34 na Vale ni Soqoni, e 39 tale ga na Vale ni Soqoni e boko na kena livaliva.

Ratou sa cicivaka tiko na cakacaka ni vakacoko na valenivolavola ni tabana e Merika, na Komiti ni Vakacoko, kei na sivia na 40 na ivakatawa ni tabacakacaka. E vakarautaki na kedra kakana, veivuke vakavuniwai, na wai, vakavinakataki na vale ena kena biu na tavuleni e delanivale, qai vagalalataki na veika era vakacacani ni lutuka na vunikau. E tuvanaki tale ga mera vakayaloqaqataki ena Vosa ni Kalou.

Era sega ni galala na tacida vakayalo ena mataqali ituvaki va qo, wili kina na leqa tubukoso, ia era nuitaka tu ga na nona dau veitokoni na Kalou.—Same 142:5.