E sega ni dua na iVakadinadina i Jiova e rawa ni lai solia na ivunau ni iVakananumi ena yakavi ni ika7 ni Epereli ena rua na valeniveivesu e Palm Beach County, Florida. Ia era qai sarava na kena vunau katoni e sivia ni 1,100 na kaivesu.

E kaya e dua na tacida tagane e dau lai caka vuli iVolatabu tiko e veimacawa e valeniveivesu: “Keimami kurabuitaka sara ga ni vakarawarawataki na ka kece. Eda vakadinadinataka ni o Jiova e vinakata mera rogoca tale ga na kaivesu na ivunau ni iVakananumi.”

Era kerea na tacida vua na vakailesilesi ni valeniveivesu ke rawa nira lai solia na ivunau ni iVakananumi ena rua na valeniveivesu. Ia e daro kece qori ena vuku ni vakatatabu ni COVID-19. Ni ratou se vakasamataka tiko na tacida na ka me caka, ratou kidacala ni sa taroga yani na vakailesilesi ni valeniveivesu na vunau katoni ni iVakananumi. Sa cakava oti na kena veivosaki me saravi ena rua na valeniveivesu.

Ratou veivosakitaka tale ga na tacida tagane me vakau vei koya na vakailesilesi ni valeniveivesu na tikidua ni veisureti ni iVakananumi me veisoliyaka se me vakabira. Dua tale na ka nodratou kidacala, ni sa vakabira oti tu ena lalaga ni valeniveivesu na ivola ni veisureti. Ena siga ni iVakananumi, sa rawa nira sarava na kaivesu kece na vunau.

Ni oti na iVakananumi, e kerei ira na tacida tagane o vakailesilesi ni valeniveivesu me so tale mai na nodra iVolatabu na kaivesu. E kau sara yani, qai veisoliyaki. Ia se levu ga mai na ota.

Eda marau ni sega mada ga ni tarova na vunautaki ni itukutuku vinaka na valeniveivesu.—Maciu 24:14.