Erau duri galugalu toka o Gathie Barnett yabaki ciwa kei na tacina o Marie yabaki walu, nira salututaka tiko na vo ni nodrau lewe ni kalasi na kuila ni Merika. Rau sega ni kila ni ka rau cakava qori ena qai tini valataki kina nodrau kisi ena Mataveilewai Cecere ena 1943. Rau vakabauta dei na veitacini qo ni dodonu me sokaloutaki duadua ga na Kalou. Rau wili tiko kei ira na vica vata na udolu na gone iVakadinadina i Jiova era dau muria na nodra lewaeloma e vakavulici ena iVolatabu.—Cakacaka 5:29.

Rau vuli tiko o Gathie kei Marie ena koronivuli na Slip Hill Grade School, mai West Virginia, rau vakasukai i vale ena vuku ni nodrau sega ni salututaka na kuila. E valataka o tamadrau na veika baleti rau me yaco sara ina Mataveilewai Cecere e Merika. E qai vakatulewataka na Mataveilewai ena ika14 ni June 1943, ni sega na dodonu vua na koronivuli me vakasaurarataka e dua na gonevuli me salututaka na kuila. E vakamatatataki tale ga kina ni sega ni nodra inaki na iVakadinadina i Jiova mera “beca na kuila se matanitu.” E kilai na veilewai qo me West Virginia State Board of Education kei rau na Barnette, qai vakatulewataki kina me bokoci na lawa a vakadonui ena dua na veilewai ena tolu na yabaki yani e liu, na Minersville School District kei ratou na Gobitis. A soli kina na dodonu vua na koronivuli me lewa nodra salutu na gonevuli. a

E ono e tokona na vakatutu qori, qai tolu ga e saqata e vakamatatataka kina ena Mataveilewai Cecere o Turaganilewa Robert Jackson: “Dua na lawa bibi ena dei tu ga ena yavu ni vakavulewa e Merika, oya ni o koya na vakailesilesi e veiliutaki ena matanitu se mani vakacava sara na levu ni nona kaukaua, me kua ni vakatura e dua na lawa me lewa vei ira na lewenivanua na nodra rai me baleta na veika vakapolitiki, vanua se lotu. Sega tale ga ni dua me veivakasaurarataki me caka se muri e dua na ka baleta ga ni vinakata na matanitu.”

Na vakatulewa qori e yaga taumada vei ira na gonevuli iVakadinadina i Jiova. Ia e kaya o Andrew Koppelman, e dua na parofesa ni lawa ena Northwestern University: “Mera vakavinavinakataki ira sara ga na iVakadinadina i Jiova o ira na dau valataka nodra dodonu na lewenivanua, nira vosota na (iVakadinadina) na veivakacacani mosimosi, kei na veitusaqati katakata e Merika ena nodra sasaga me baleta na nodra dodonu. Qori na ka eda sa qai mai marautaka tu nikua na kena yaga.”

E sega ni yala ga e Merika na kaukaua ni lawa qori. E vakamacalataka o Philip Brumley, na loya e dau vakasalataki ira na iVakadinadina i Jiova ena veika vakalawa: “Na vakatulewa e vakayacori qo vei rau na Barnette e yaga vakalevu, ni sa bau vakayagataki tale ga ena Mataveilewai Cecere e Argentina, Kenada, Costa Rica, Ghana, Idia, Yatu Filipaini, kei Rwanda, vaka kina na Mataveilewai Cecere e Merika (ECHR) e dua e valataka nodra dodonu na lewenivanua.”

Ena 2006 rau sureti o Gathie kei Marie me rau veitalanoataka kei na so na vakailesilesi vuku na veika e yaco ena nodrau veilewai, qai vakayacori qori ena dua na vanua e dau maroroi kina na itukutuku makawa, na Robert H. Jackson Center, e Niu Yoka. E tukuna o Marie: “Au marautaka vakalevu ni qai yaga na lawa qori vei ira eso tale na gonevuli.” E kaya o Gathie: “Au se nanuma tiko ga nona sega ni salututaka na kuila o luvequ tagane qase, oti qai vakatalai me lai raici qasenivuli liu. Ia e kaya tale vua o qasenivuli liu: ‘Sa rairai guilecava nomu qasenivuli na vakatulewa ni Mataveilewai Cecere.’”

E tukuna o Gathie e dua na ka era duavata kina na iVakadinadina i Jiova: “Keimami doka na kuila kei na veika e matataka. Keimami sega ni cata qori. Keimami sega ga ni sokaloutaka se salututaka.”—1 Joni 5:21.