1 JUNE, 2016
MERIKA
Volitaka na iVakadinadina i Jiova e Dua na iSakisaki kei Brooklyn
Na irairai ni Towers Hotel ena veigauna sa oti.
NIU YOKA—A vakadeitaki ena ika24 ni Me, 2016, nira sa na volitaka na iVakadinadina i Jiova na vale taba 16 e tiko ena dua na yasayasa kilai levu e Brooklyn. A otela tu e liu na tabavale qori, e 29,150 na mita vakarivirivi na kena levu. Eratou yadua toka na tutu ni vale e va na tawa (tower) e isakisaki tu kei Brooklyn me ciwasagavulu na yabaki.
A dau kilai tu na tabavale qo me Leverich Towers Hotel, a dola ena 1928. A cakava na peleni ni otela na kabani kilai levu na Starrett & Van Vleck. Na kabani qori a droinitaka tale ga na peleni ni rua na sitoa lelevu ena korolevu o Niu Yoka. Oti e vica na yabaki, a veisau na yaca ni otela me Towers Hotel ni sa dua na kena itaukei vou. Na itaratara ni otela e vaka na itaratara ni vale e Urope ena veiyabaki ni 500 ina 1500 B.G.V. E dua tu na kena rumu levu ni soqo, kei na dua na vanua ni gade e delanivale e saravi vinaka kina na yasayasa o Manhattan, na toba kei Niu Yoka, kei na wavu e Brooklyn. E dau vakatokai tu na otela qori me “nodra otela na sucu turaga.”
iRairai ni lomanivale a biu kina na ikabakaba vou.
Dua na ituvaki vakaloloma a tu kina na otela nira volia na iVakadinadina i Jiova ena ika14 ni Janueri, 1975. Ni vakavinakataki oti na vale ena 1978, a vakayagataki na vale me nodra icili kei na nodra vanua ni kana e sivia na le 1,000 era veiqaravi ena itikotiko liu ni iVakadinadina i Jiova. E kaya o Richard Devine na nodra gusunivosa na iVakadinadina: “A vinakati vakalevu na tamata cakacaka ena vanua ni tabaivola, e veiganiti vinaka kina na tabavale qo me nodra icili.”
Mai na vanua ni gade e delanivale mo qai rai vaka ina vualiku, o rawa ni raica na itikotiko liu ni iVakadinadina i Jiova, na wavu e Brooklyn kei Manhattan, kei na vale ni maroroi itukutuku e toka sara mai vakayawa.
Dua na ripea levu sara era cakava na iVakadinadina ena 1995, qai vakavinakataki kina eso na ka e dau idivi tu ni otela. E kaya o Richard Devine me baleta na cakacaka ni ripea: “A ripeataki taucoko na lomanivale ena veiyabaki ni 1990, qai veisautaki na paipo kei na wanilivaliva. Ia sa qai biu ga e dua na ikabakaba vou mai na vanua ni kana ina vanua era dau qaravi kina na vulagi nira se qai curu yani.”
E kaya o David A. Semonian e dua na nodra gusunivosa na iVakadinadina ena itikotiko liu: “Ke o taubale tiko ena yasayasa o Brooklyn Heights, ena dreta na matamu na totoka ni tabavale e vakatokai me Towers. Dua na cakacaka levu e vakayacori me totoka tu ga kina na irairai ni tabavale, sa sagavulu na yabaki na nodra vakaicili tu kina o ira na veiqaravi ena neimami itikotiko liu.”
Gusunivosa:
David A. Semonian, Valenivolavola ni iTukutuku, 1-718-560-5000