Ena ika17 ni Okotova 2019, era tovata na ovisa kei na dua na ilawalawa matayadra e Mexico mera veivanavanai kei na dua na ilawalawa e dau volitaki wainimate gaga era vakaiyaragi tu, e Culiacán, Sinaloa, e Mexico, e dua na siti era tiko kina e voleka ni dua na milioni na lewenivanua. Ni caka tiko na veivanavanai era sogo e levu na gaunisala, era vakamai e levu na motoka, era dro tale ga eso na kaivesu. Era kaya na vakailesilesi ni ratou mate e 14. Ia e ka ni rarawa ni vakaraitaka na Valenivolavola ni Tabana e Merika e Loma ni mate tale ga e dua na tacida o Brother Noé Beltrán.

E yabaki 39 o Brother Beltrán, e tolu na luvena. E lauvana ni cakacaka tiko. Era lai veivakacegui, era lai veivakayaloqaqataki vei watina o Rocío, kei na tolu na luvedrau na mataveitacini kei na ivakatawa ni tabacakacaka.

E tiko e Culiacán e rauta ni 80 na ivavakoso era lewena e sivia e 7,000 na dautukutuku. Ena gauna ni tikoyavavala qori, eso na ivavakoso era veiveisautaka nodra gauna ni soqoni ena lomanimacawa, kei na cakacaka vakavunau. Eso na tacida era sema ga mai nodra vale ena soqoni ena lomanimacawa. Era vakaliuliu sara ga na ivakatawa ni tabacakacaka mera veivakatawani vei ira na mataveitacini era sotava na ituvaki vakadomobula qori, e tawanamaki tale ga.

Eda rarawataka dina nona mai mate o Brother Beltrán, eda kerea mada ga vei Jiova me tokoni ratou tiko ga na luvena kei watina o Sister Beltrán. Eda vakanamata tu ina gauna sa na vakilai kina e vuravura na vakacegu, me sosomitaka na rarawa na “marau levu.”—Marika 5:42.