Ena imatai ni Janueri 2023, e kacivaka o Brother Armando Ochoa, e lewe ni Komiti ni Tabana e Merika e Loma, ni sa tiko ena jw.org kei na JW Library Sign Language, na New World Translation of the Holy Scriptures ena vosa vagalu ni Mexico (LSM). A caka na soqo lavotaki qori ena Vale ni Soqoni Lelevu e El Tejocote.

Mai na gauna e veitauvi kina na matedewa na COVID-19, se qai imatai ni gauna qo mera soqoni vata kina na iVakadinadina i Jiova e Merika e Loma. Era tiko kina e rauta ni le 2,317 na mataveitacini. E vica vata tale na udolu era vakarorogo ena stream ena Vale ni Soqoni Lelevu, kei na Vale ni Soqoni ena veivanua e Mexico.

Rau tiko tale ga kina o Mr. Sergio Peña, e kenadau ena vosa vagalu ni Merika kei na LSM, kei Ms. María Teresa Vázquez, na dairekita ni koronivuli na Institute for the Inclusion of People with Disabilities ena yasayasa o Yucatan.

E kaya o Mr. Peña: “Au vakavinavinakataki ira na iVakadinadina i Jiova e Mexico. Me yacova mai na imatai ni Janueri 2023, sa tiko na nodra iVolatabu na galu . . . ena vosa vagalu ni Mexico. Dua na ka noqu qoroya, au rawa ni kaya ‘ni vakasakiti dina na ivola qo.’”

Ena Okosita 2008, sa tekivu vakadewataki kina na iVolatabu qori mai na iVolatabu vaKirisi vaKarisito. Ena 14 na yabaki sa oti, e sevutaki yadudua tiko mai na ivola ena iVolatabu. Qo na imatai ni iVolatabu taucoko me sevutaki ena vosa vagalu ni Mexico.

Ni veitauvi tiko na matedewa, e yaga sara ga vei ira na galu na sevutaki ni vica na ivola ena iVolatabu. E kaya e dua na tacida tagane: “Dina ni veitauvi tu na COVID-19, ia au vakavinavinaka vakalevu ni vakarautaki tiko ga mai na ivola ena iVolatabu. Qo e dua na sala e vukei keimami kina o Jiova me dei neimami vakabauta.”

E kaya e dua na tacida yalewa: “Ni bera ni sevutaki na iVolatabu qo, era dau vakadewataka vei au na tacida na tikinivolatabu. E ka ni sasaga toka ni so vei ira e duidui na sala era vakadewa kina. E dredre kina meu katona na tikinivolatabu. Ia qo sa rawarawa noqu kila vinaka na iVolatabu.”

Eda nuidei ni na yaga na iVolatabu qori vei ira na tacida era galu, kei ira na sega ni dau rogoca vinaka na ka. Meda masulaka ni na vakalougatataka o Jiova na nodra sasaga mera wasea vei ira eso tale na ‘inuinui kei na ka mera namaka ena gauna se bera mai.’—Jeremaia 29:11.