Ena ika27 ni Seviteba 2019, e sevutaki na New World Translation of the Christian Greek Scriptures ena vosa vakaZapotec (Isthmus), ena soqo ni veiwasewase e San Blas Atempa, Oaxaca mai Mexico. Era marautaka na le 1,983 nona sevutaka na iVolatabu qori o Brother Joel Izaguirre, e lewe ni Komiti ni Tabana e Merika e Loma. Qori na imatai tale ga ni iVolatabu me vakadewataki ena vosa vakaZapotec (Isthmus) a, e tiko kina na yaca ni Kalou o Jiova.

E vica na ituvaki dredre era sotava na daunivakadewa ni vakadewataki tiko na iVolatabu qori. Nira toki oti ga ina valenivolavola ni vakadewa tu yawa (RTO), e yaco sara na tiko yavavala vakapolitiki, kei na veileti vakamatamata. Era sogota na gaunisala ina siti e dua na ilawalawa voravora. Dua taucoko na vula na kena yaco tiko na ituvaki qori, vakavuna me lailai kina na kakana. Ia eda vakavinavinakataka nodra veivuke na mataveitacini ena koro voleka, nira vakarautaka vei ira na daunivakadewa na vuata kei na kakanadraudrau era tea. Dua tale na ituvaki era sotava, oya na kena kurea na siti qori e dua na uneune e rauta ni 8.2 na kena kaukaua ena ika7 ni Seviteba 2017, qai vakacacani vakalevu na RTO. Totolo ga na kena tuvanaka na valenivolavola ni tabana e Merika e Loma mera tokitaki na daunivakadewa. Kuria ya, e tuvanaka e dua na lewe ni iLawalawa Dauvakatulewa me sota kei ira na timi taucoko ni vakadewa ni vakayagataki na vidio me vakayaloqaqataki ira vakayalo.

Na iVolatabu vou qo ena rawa ni vukei ira e levu tale era vosa vakaZapotec “mera mai kila vinaka na ka dina.”—1 Timoci 2:3, 4.