Ena ika25 ni Okotova, 2019 e vakayacori na soqo ni veiwasewase e Mérida, Yucatán, e Mexico. Qori na siga guiguilecavi dredre vei ira na tacida era vosa vakaMaya, ni sevutaka kina o Brother Esteban Bunn, e lewe ni Komiti ni Tabana e Merika e Loma, na New World Translation of the Holy Scriptures ena vosa qori. A vakayacori na soqo ena Vale ni Soqo Lelevu e Mérida, era sarava tale ga o ira na tiko ena Poliforum Zamná. Qo ena vukei ira vakalevu ena cakacaka vakavunau o ira na 762,000 na lewenivanua era vosa vakaMaya e Mexico, kei Merika.

E tiko ga na New World Translation of the Christian Greek Scriptures ena vosa vakaMaya. E sevutaki qori ena ika14 ni Tiseba, 2012. Tekivu ena gauna qori, e tabaki e rauta ni 29,000 na iVolatabu.

E kaya e dua na daunivakadewa: “Era dau raica vakabibi o ira na vosa vakaMaya na iVolatabu, era doka tale ga. Ia e dredre vei ira e levu mera kila na ka era wilika ena vosa vakaMaya. Keitou saga gona me keitou vakayagataka na vosa ni veisiga e matata, kilai rawarawa tale ga vei ira na lewenivanua.”

E dredre toka na vakadewataki ni iVolatabu ena vosa vakaMaya, ni duidui vakalevu na kena vosa ena dui yasayasa. E vakadewataki kina na imatai ni tabana me, Biblia ich maya, kena ibalebale “iVolatabu ena Vosa vakaMaya.” Kuria ya, e sivia e 6,000 na ivakamacala e ra ni iVolatabu, e rawarawa sara eso na ibiubiu ni vosa qori se matavosa. Ena vukei ira na dauwiliwili mera kila na ka era wilika.

Na ivakadewa vou ni iVolatabu qo, e vaka na ‘kakana vakayalo ena kena gauna donu.’ E ivukevuke yaga tale ga vei ira na vosa vakaMaya nira vuli vakataki ira, se cakacaka vakavunau.—Maciu 24:45.