Ena ika8 ni Okosita 2021, e sevutaka o Brother José Nieto, e lewe ni Komiti ni Tabana e Merika e Loma, na New World Translation of the Christian Greek Scriptures vakaMixtec (Guerrero). E sevutaki qori ena iyaya vakalivaliva. E katoni na kena porokaramu, ra qai vakarorogo kina e 785 na lewenivanua. Ratou sa tuvanaka tale ga na valenivolavola ni tabana me tabaki na iVolatabu qo ena Noveba 2021. Me qai vakau ena dui ivavakoso ena Tiseba 2021, se Janueri 2022.

Ni caka tiko na porokaramu e wilika o Brother Nieto na 1 Korinica 14:9. Oti e kaya sara: “E kaukaua na vosa ni Kalou. Ia me rawa ni tara na lomadra na dauwiliwili, ena vinakati me vakadewataki ena vosa e kilai rawarawa  . . ., qai vakayagataki e veisiga.”

E dau veiveisau na itautau ni vosa vakaMixtec (Guerrero), e duidui tale ga na kena ibalebale. Era vosataka na vosa qo e 150,000 na lewenivanua era tiko ena vanua o Guerrero e Mexico, kei na so tale na vanua e Mexico kei Merika.

E kaya o Brother Lázaro González, e lewe ni Komiti ni Tabana e Merika e Loma: “Levu era vosa vakaMixtec (Guerrero) era tiko ena vanua dravuadravua, qai levu kina na itovo kaukaua. Ia sa qai ca sara vakalevu qo ni veitauvi tiko na COVID-19. Era nanuma kina e levu ni sa guilecavi ira na Kalou. Ia o Jiova e kauaitaki ira vakalevu ni solia sara ga vei ira na iVolatabu qo ena nodra vosa.”

Ni bera ni sevutaki na iVolatabu qo, e rua tu ga na vakadewa ni iVolatabu vaKirisi vaKarisito ena vosa vakaMixtec (Guerrero). E dredre me kilai na kena vakadewa nira vakadewataka o ira era gole mai na rua na duidui vanua. Ra qai vakayagataka na vosa e kilai ga ena nodra vanua, qai dredre me kilai ena so tale na vanua.

Ia na vakadewa ni iVolatabu qo e rawarawa me kilai. Kena ivakaraitaki, e kaya na Maciu 5:9: “Era marau o ira na saga na veisaututaki.” Na vosa “sautu” e sega na kena vakadewa donu vakaMixtec (Guerrero). Me rawa gona ni donu na vakasama ena tikinivolatabu qo, e mani vakadewataki va qo: “Era marau o ira na qara na sala mera tarova kina na leqa.” Qori e tautauvata sara ga kei na kena ibalebale ena vosa vakavalagi.

E kaya e dua na daunivakadewa: “Dua noqu tikinivolatabu taleitaki na 1 Pita 1:25, e tukuni kina ni vosa i Jiova ena tu ga me tawamudu.’ Ena sega ni vakainaki noqu bula ke sega na iVolatabu. Au vakavinavinaka vakalevu vei Jiova ni maroroya tu mai nona vosa me yacova mai qo. Ia qo keimami sa rawa ni wilika ga ena vosa vakaMixtec (Guerrero).”

E kaya e dua tale na daunivakadewa: “Au vakadinadinataka nona tokoni keitou o Jiova ena veivuke ni yalona tabu. Au vakadeitaka kina ni sega ni dua na ka e dredre vua. Ena sega ni dua na ka e tarova nona vosa.”—2 Timoci 2:9.