Ena ika18 ni Julai 2021, e sevutaka o Brother Arturo Manzanares, e lewe ni Komiti ni Tabana e Merika e Loma na New World Translation of the Christian Greek Scriptures ena vosa vakaTojolabal.

Era vosataka na vosa qo e sivia na 66,000 na lewenivanua era tiko ena yasayasa e Chiapas e Mexico, ena ceva volekati Guatemala. E sevutaki na iVolatabu qo ena iyaya vakalivaliva, e katoni na kena porokaramu, ra qai vakarorogo kina e 2,800 na mataveitacini.

E taroga o koya e vunau, “Cava e vinakati kina na iVolatabu ena vosa vakaTojolabal?” Oti e kaya sara: “Ni bibi me lagiti kina o koya e vakavuna na iVolatabu na Kalou o Jiova.”

E kaya e dua na tacida yalewa e veivuke ena vakadewataki ni iVolatabu qo: “E tarai au vakalevu niu wilika na Joni 5:28, 29. Au raitayaloyalotaka na gauna sa na vakaturi mai kina o tinaqu. Au sa dau wilika vakalevu na tikinivolatabu qo ena vosa vakaSipeni. Ia e matata cake sara vei au niu wilika ena noqu vosa ga. Vinaka vakalevu!”

Gauna e vakadewataki tiko kina na iVolatabu era tokitaki na timi ni vakadewa mai na valenivolavola ni tabana e Merika e Loma volekata na siti o Mexico, ina valenivolavola ni vakadewa tu yawa (RTO) e Las Margaritas, e Chiapas. E tiko na RTO qori ena yalava e vosataki kina na vosa vakaTojolabal. Qai rauta ni 990 na kilomita na kena yawa mai na valenivolavola ni tabana. E le ciwa na daunivakadewa ratou veiqaravi tiko vakatabakidua ena RTO, e le lima tale na tacida ratou dau veitokoni tiko kina. Dina nira veikilai vosa na tiko ena yasayasa qo, ia eso na vosa e duidui vakalailai na kedra ibalebale. Ratou saga gona na daunivakadewa me ratou vakadewataka donu na iVolatabu, me kilai rawarawa tale ga.

Kena ivakaraitaki, eso na ivakadewa ni iVolatabu era vakadewataka na “Matanitu ni Kalou,” me “vanua e veivakaroti kina na Kalou” se “na tauni (se siti) ni Kalou.” Ia ena sega ni matata sara vei ira na dauwiliwili era sega ni dau vakayagataka na vosa qori. Na New World Translation gona vakaTojolabal sa qai vakadewataka na “Matanitu ni Kalou,” ena sala ena rawarawa kina nodra kila na dauwiliwili.

E kaya e dua na tacida yalewa e varororogo tiko ena porokaramu: “O Jiova e dusimaki ratou na daunivakadewa me ratou vakadewataka donu na iVolatabu, me matata qai kilai rawarawa tale ga. Au nuidei ni iloloma talei qo ena uqeta na lomadra e levu era se sega ni kila na Kalou.”—Cakacaka 17:27.