Ena 2017 e kurei Guatemala kei Mexico e rua na uneune kaukaua. Ena Tiseba 2018, era vakacavara kina na tacida na veivuke ena yasayasa qori.

E tuvanaka na valenivolavola ni tabana e Merika e Loma na veivuke ena vakacoko, kei na bose mera vakayaloqaqataki kina na tacida era vakaleqai. A vakayacori qori ena yasayasa o Chiapas, Morelos, Oaxaca, Puebla, kei na siti o Mexico. Ena veidusimaki ni Komiti ni Tabana e tauyavutaki kina e 39 na Komiti ni Vakacoko mera veivuke ena vakacoko.

Era veivuke ena vakacoko e sivia na le 42,000 na tacida era cavutu ena tini na yasayasa e Mexico. Era tara tale e 619 na vale, 5 na Vale ni Soqoni kei na 2 na Vale ni Soqo Lelevu. Era vakavinakataka tale ga e 502 na vale kei na 53 na Vale ni Soqoni. E tara tale e tini na vale e Guatemala.

Ratou a vukei tale ga na vuvale na Hernández kei na Santiago.

Ratou vakaitikotiko na vuvale na Hernández ena siti o Chalco, e 40 na kilomita ena taudaku ni siti o Mexico. Ena ika19 ni Seviteba, 2017, e vakacacana na uneune nodratou vale. E kaya o Sister Ana María Hernández: “Keitou sega vakadua ni lekata e dua na ka ena dredre keitou sotava qo. Era vukei keitou na mataveitacini. Au se nanuma vinaka tu nodra veivuke e sivia na le 50 na tacida mera tara na neitou vale vou. Me yacova mai qo, dua na ka nodra qoroya o ira na tiko volekati keitou na ka era cakava na tacida.” A sikovi ratou tale ga e dua na mata ena valenivolavola ni tabana e Merika e Loma me vakayaloqaqataki ratou vakaivolatabu.

Ratou vakaitikotiko na vuvale na Santiago ena siti o Juchitán, ena yasayasa o Oaxaca. Ena ika7 ni Seviteba, 2017, a vakacacana nodratou vale na uneune, sega tale ni dua na ka e vo. Ena loma ga ni ono na vula era tara o ira na veivuke ena vakacoko nodratou vale vou. E kaya o Brother Victor Santiago: “Au qoroya dina na totolo ni nona vukei keitou na isoqosoqo i Jiova. E raica sara tu ga o Jiova na ka keitou vinakata qai vukei keitou.”

E kaya o Brother Jesse Pérez, e dua na lewe ni Komiti ni Tabana e Merika e Loma: “Na rua na uneune qo e vakacacana e levu na vale. Ia na veivuke ni vakacoko e uqeti ira na tacida mera dau bolecakacaka. Levu na tacida era veivuke, ra vakaraitaka tale ga nodra veilomani vakamataveitacini. Eda marau ni vakalougatataka tiko o Jiova na ‘soli ka ni veivuke.’”—2 Korinica 8:1-4.