SITI O MEXICO—Ena ika4 ni Tiseba, 2017 era buturaki ira na 12 na tacida e dua na ilala levu ena tauni o Tuxpan de Bolaños e toka ena veiulunivanua e Jalisco, Mexico. Era vakaitikotiko na tacida qori ena koro o Huichol. Era cemuri tale ga e le 36 tale era dau lala vata kei ratou na tacida qori. Era cakava na itovo voravora qori, nira cudruvaka nodra sega ni via vakaitavi na iVakadinadina ena ivakarau vakalotu era dau cakava o ira e Huichol. Era mani qara veivuke na tacida ina tabana ni lawa.

Era doka na vakailesilesi e Mexico na nodra galala na lewenivanua ena ivakavuvuli kei na ivakarau vakavanua e Huichol, era vakadonuya gona na veiliutaki e Huichol, mera cemuri tani na tacida mai na nodra itikotiko. Era vakacacana na nodra vale, butakoca na katuba ni vale, katubaleka, kei na kava ena dokanivale. Na iyaya e sega ni butakoci e kolotaki laivi. Era kau i veikau na tacida qai tukuni vei ira nira na vakamatei ke ra lesu i nodra itikotiko.

E gole e dua na mata mai na valenivolavola ni tabana e Mexico me lai vakayaloqaqataki ira na tacida era vakaleqai ena iVolatabu, e tuvanaki tale ga mera vakavaletaki. E caka e dua na bose era sota kina na mata ni veika vakalawa ni iVakadinadina i Jiova, kei ira na veiliutaki e Jalisco, ira na valataka na dodonu ni tamata, na vakailesilesi ni dauveibeitaki ni vanua qori, kei na nodra dairekita na vakaleqai ena basulawa. Era se vaqaqa tiko ga na vakailesilesi ni veika vakalawa na vakacaca qori.

E kaya o Brother Gamaliel Camarillo, na mata ni iVakadinadina i Jiova e Mexico: “Kemami sega ni taleitaka na ka e caka qori vei ira keimami lotu vata, nira sega ni dau vakavuna na tiko yavavala, ra qai doka na ivakarau vakavanua. Ia qo era vakacacani nira sega ni vakaitavi ena ka vakalotu baleta era kila ni na vakaleqa nodra lewaeloma. Keimami nuitaka nira na cakava na vakailesilesi e dua na ka ena tikina qo.”

Meda nanumi ira mada ga ena masu na tacida era vakaleqai qori, eda nuidei ni na vakarautaka o Jiova na ka mera na bula kina, ni vakayagataka na nona isoqosoqo.—Aisea 32:2.

Gusunivosa:

Veiyasa i vuravura: David A. Semonian, Valenivolavola ni iTukutuku, +1-845-524-3000

Mexico: Gamaliel Camarillo, +52-555-133-3048