Ena muanimacawa ni ika15 kei na 16 ni Okosita 2020, e sevutaki kina na New World Translation of the Christian Greek Scriptures ena vosa vakaChangana kei na vakaMacua ena iyaya vakalivaliva vei ira na dautukutuku e Mozambique. Era vosataka na vosa vakaChangana e sivia ni 8,000 na dautukutuku, kei na vosa vakaMacua e sivia ni 1,700.

E sevutaka na iVolatabu qori o Brother David Amorim, e lewe ni Komiti ni Tabana e Mozambique, sa katoni oti tu na porokaramu qori, era qai sema ga mai na dautukutuku. E vakadonui tale ga me kaburaki na soqo qori ena siteseni ni tivi kei na sivia e 30 na siteseni ni retio.

E vosataki vakalevu na vosa vakaChangana ena rua na yasana ena ceva kei Mozambique, era vosataka e rauta ni 1.9 na milioni na lewenivanua. E via tautauvata kei na vosa vakaTsonga, e vosataki e Sauca Aferika.

Ia e dua na yasana ena vualiku kei Mozambique era tiko kina o ira na vosataka na vosa vakaMacua. E rauta ni 5.8 na milioni na lewenivanua, qai qori e dua na vosa e vosataki vakalevu vei ira na itaukei kei Mozambique.

Sa vakayabaki na nodra vinakata tu na dautukutuku ena vanua qori mera yadua na iVolatabu. E saulevu, ena so na vanua e dau dredre sara ga me volitaki na iVolatabu vei ira na iVakadinadina i Jiova. E kaya e dua na daunivakadewa: “Au raica ni so na ivavakoso e rawa ni maroroi tu ga ena Vale ni Soqoni e dua na iVolatabu, me qai lai vakayagataka ga o koya e vunau kei koya e vakaitavi.”

Dua na ka noda marau kei ira na tacida qori ni sa sevutaki na nodra iVolatabu. Eda kila ni iVolatabu qori ena vukei ira dina na lewenivanua mera mai “kila vinaka na ka dina.”—1 Timoci 2:3, 4.