Ena ika18 ni June 2023, e sevutaki na New World Translation of the Holy Scriptures ena vosa vakaChangana (Mozambique). E sevutaka o Brother Charles Fonseca, e lewe ni Komiti ni Tabana e Mozambique. Era tiko ena soqo qori na le 16,245 ena koroturaga kei Mozambique o Maputo. E veisoliyaki na kena ilavelave tabaki qai rawa tale ga ni download ena iyaya vakalivaliva.

Era vosataka na vosa vakaChangana e rauta na le 4.2 na milioni na lewenivanua. Levu vei ira qori era tiko ena rua na yasana ena ceva kei Mozambique, o Maputo kei Gaza. E levu na mataqali vosa vakaChangana (Mozambique), e saga gona na timi ni vakadewa me biu ena iVolatabu na vosa era na kila e levu na dauwiliwili ena vanua cava ga era tiko kina.

Ni bera ni sevutaki na iVolatabu vou qo, era dau vakayagataka na iVolatabu vakaTsonga e levu na dautukutuku era vosa vakaChangana (Mozambique). E via tautauvata na rua na vosa qori. Ia e vakadredretaka na kena vulici na ka dina mai na iVolatabu. E kaya e dua na daunivakadewa: “Ena yaga na iVolatabu vou qo vei ira na vosa vakaChangana (Mozambique), ena tara sara ga na lomadra na ka era wilika.”

E vakamacalataka e dua na daunivakadewa e dua na ivakaraitaki ni kena matata na New World Translation ena vosa vakaChangana (Mozambique). E kaya: “Ena so na iVolatabu, e dau vakadewataki cala na vosa “yalo” me vakaibalebaletaka e dua na ka e bula tiko ga ni dua e mate. Ia e donu vinaka na New World Translation ena vosa vakaChangana (Mozambique), e kilai kina ni lesu vua na Kalou na ‘igu ni bula,’ sega ni o koya e sa mate.”

Eda marau nida vakadinadinataka nona ‘tala yani nona rarama kei na dina’ o Jiova ni vakamatatataki na nona Vosa vei ira na vosa vakaChangana (Mozambique)—Same 43:3.