Ena ika19 ni June 2022, e sevutaka o Brother Patrick Hecker, e lewe ni Komiti ni Tabana e Mozambique na New World Translation of the Christian Greek Scriptures ena vosa vakaLomwe. E katoni na kena ivunau, qai sevutaki ena iyaya vakalivaliva. E levu na tacida ena ivavakoso vosa vakaLomwe era rogoca na ivunau qori ena nodra Vale ni Soqoni. Ra qai yadua na ilavelave ni iVolatabu.

Tekivu ena 1930, sa tu eso na iVolatabu vakaLomwe. Ia e saulevu, qai vakayagataki kina na vosa makawa. E laurai tale ga kina eso na cala. Kena ivakaraitaki, qo na vakadewa ni Luke 23:43: “Au tukuna vei iko nikua, daru na tiko vata mai lomalagi.” Ia e donu vinaka na vakadewa ni New World Translation of the Christian Greek Scriptures, e kaya: “Au tukuna vakadodonu vei iko nikua, daru na tiko vata mai Parataisi.”

E kaya kina e dua vei ratou na daunivakadewa ena kena sevutaki na iVolatabu qori: “E matata qai rawarawa ni wiliki na New World Translation of the Christian Greek Scriptures qo. Ena vukei ira na tacida mera kila na ibalebale ni tikinivolatabu, ena uqeti ira tale ga mera bulataka na ka era vulica.”

Eda vakadeitaka ni na yaga dina vei ira na mataveitacini na iVolatabu vou qori. Me rawa nira kauaitaka tiko ga nodra bula vakayalo, qai vakaitavi ena cakacaka vakaitalatala.—Maciu 5:3.