Ena ika4 ni Epereli 2021, a vakayacori e dua na soqo lavotaki mai Nigeria. E sevutaka kina o Brother Kenneth Cook, e lewe ni iLawalawa Dauvakatulewa na vakadewa vakavoutaki ni New World Translation of the Holy Scriptures ena vosa vakaIgbo. Era sarava ena internet na porokaramu qo e sivia ni 1,140 na ivavakoso era vosataka na vosa qo, ra qai marautaka vakalevu. Sa oti qo e 14 na yabaki mai na kena sevutaki na imatai ni New World Translation ena vosa qo.

Na iVolatabu qo ena yaga sara vei ira e sivia na 50,000 na dautukutuku era veiqaravi ena ivavakoso, kei na iwasewase lailai era vosa vakaIgbo. Ena yaga tale ga ena cakacaka vakavunau vei ira e rauta ni 40 na milioni na lewenivanua era vosataka na vosa qo.

E kaya e dua na tacida a vakaitavi ena vakadewataki ni iVolatabu qo: “Levu na ivakamacala e ra, e tiko ena vakadewa vakavoutaki ni New World Translation qo. Ena tara sara ga na lomadra na dauwiliwili. E sega ni vakamacalataki ga ena ivakamacala e ra na ibalebale ni vosa, se ivosavosa vakaIperiu se vaKirisi. Eso e duidui ga mai na vosa vakaIgbo, e okati kina na ivosavosa ena vukei ira na dauwiliwili era vosataka e levu na vosa mera kila vinaka na ibalebale ni tikinivolatabu.”

E kaya o Brother Archibong Ebiti, e lewe ni Komiti ni Tabana e Nigeria: “Le ono na tacida ratou vakadewataka na iVolatabu qo ena loma ni va na yabaki. Dina ni vakilai eso na ituvaki dredre ena gauna ni COVID-19, ia keimami vakavinavinakataki Jiova ni rawa ni ratou qarava vinaka na tacida qo nodratou itavi ena veivuke ni nona yalotabu.”

Eda nuidei nira na marautaka na tacida era vosa vakaIgbo e veiyasa i vuravura na ivakadewa vou qo. Ena rawarawa tale ga nira veivakavulici kina, ra qai vakamacalataka “vakadodonu  . . . na sala ni Kalou” vei ira eso tale.—Cakacaka 18:26.