Era tiko ena rua na soqo lavotaki na tacida mai Nigeria mera vakananuma kina na 100 na yabaki ni nodra veivakavulici ena iVolatabu. Ena ika12 ni Tiseba 2021, era sureti na ivavakoso kece e Nigeria mera sarava na kena porokaramu e katoni kina na ivunau, kei na veitarotarogi me baleta na cakacaka vakavunau ena vanua qori. E vakadewataki na porokaramu qo ena vosa vaka-Efik, vakavalagi, vaka-Igbo, vagalu ni Nigeria, vakaPidgin (Ra kei Aferika), kei na vosa vakaYoruba. Ena ika10 ni Tiseba 2021, e dola e dua na vanua ni sarasara ena valenivolavola ni tabana e Nigeria. Gauna qo e rawa ga nira sarasara kina o ira na veiqaravi tiko e valenivolavola ni tabana. Ena qai dola vakamalua vei ira na vulagi.

E vakatokai na vanua ni sarasara qo “100 Years of Courage,” (“100 na Yabaki ni Yaloqaqa”). E vakamacalataki kina na nodra yaloqaqa ni vunau, kei na dei ni nodra vakabauta na tacida e Nigeria. Dina ni vakatabui na ivola vakaivolatabu, ra vakalialiai, e yaco tale ga na ivalu, ia era yaloqaqa tiko ga. Na katokatoni kei na vidio e vakaraitaki kina, e rawa nira raitayaloyalotaka na sarasara na ka sara ga era sotava tu na tacida ena gauna ya. E laurai tale ga kina na tubu ni cakacaka e Nigeria mai na Tiseba 1921. Dina nira le lailai ga era vulica na iVolatabu ena gauna ya e Lagos, ia me yacova mai qo sa sivia e 400,000 na dautukutuku era vunau tiko ena veivanua e Nigeria.

Eda vakayaloqaqataki kei ira na tacida e Nigeria ena nodra ivakaraitaki ni vakabauta na tacida e kea ena sivia na 100 na yabaki sa oti.—Joni 16:33.