Ena imatai ni Okosita ina ika31 ni Okotova 2019, e tuvanaka na valenivolavola ni tabana e Noca kei Masitonia e dua na vunau lavotaki vei ira ena vosa vakaMasitonia, kei na vakaAlabania ena yalava e qarava na vale ni volavola ni tabana.

Era tiko e Noca Masitonia e sivia ni 1.3 na milioni era vosa vakaMasitonia, e sivia ni veimama na milioni era vosa vakaAlbania. Ia era tiko kina e 1,300 na dautukutuku, e rauta ni 1,000 era veiqaravi tiko ena yalava ena vosa vakaMasitonia, e 20 ga na dautukutuku e veitokoni ena yalava vosa vakaAlbania. Era sa qai mai veitokoni ena vunau lavotaki qori e 476 na bolecakacaka ena vitu na matanitu me vakataki Albania, Austria, Belgium, Jamani, Itali, Suwiteni, kei Suwitisiladi.

Ena vunau lavotaki qori, rau sota e gaunisala e dua na tacida kei na dua na ivakatawa ni me. Na gauna e kila kina na turaga qori ni vosa tiko vua e dua na iVakadinadina i Jiova, e ucuna sara mai ena nona kato na ivola Kaya na iVolatabu, e vakaraitaka vua na tacida. E kaya o koya ni solia vua na ivola qori e dua na iVakadinadina i Jiova mai Itali ena dua na vunau lavotaki e vakayacori ena vanua qori ena tini na yabaki sa oti. Sa qai kaya o koya ni dau wilika e veisiga na ivola qori Kaya na iVolatabu, e sa cavuqaqataka mada eso na wase. E mani tuvanaka sara na tacida qori na veisikovi lesu.

Na yalo ni veitokoni era vakaraitaka na tacida era vosa vakaMasitonia kei ira na vosa vakaAlbania, eda lai nanuma kina na nona yalorawarawa o Paula me ciqoma na nona ilesilesi me ‘lako i Masitonia.’—Cakacaka 16:9.