Ena ika30 ni Tiseba 2022, sa vakadonuya na mataveilewai na Oslo District Court na noda kerekere na iVakadinadina i Jiova.E kaya me tarovi tu mada na kena sagai me bokoci noda vakalawataki e Norway. E caka na kerekere ina mataveilewai ni oti nona kaya na Kovana e Oslo kei Viken me sa bokoci na noda vakalawataki e Norway. E tarovi tu qori me yacova ni dikeva na mataveilewai. Ia e saga tiko na tabana ni matanitu na Ministry of Children and Families me veisautaka na lewa sa tau.

E yaga vakalevu vei ira na tacida na ka e vakatulewataka na mataveilewai, vakabibi vei ira na vakarau vakamau. Ni dau caka na vakamau e Norway, ena lesia na matanitu o koya e qarava na vakamau mai vei ira na matalotu era sa vakalawataki tu. Ena rawa gona nira sega ni cakava na vakamau na tacida tagane era sa lesi ke sa bokoci na noda vakalawataki e Norway. Ia na kena se tarovi tu qori, e rawa kina vei ira na tacida era sa veimusumusuki tu, mera vakamau ena Vale ni Soqoni qai qarava tale ga e dua na tacida na nodra vakamau.

Dua vei ira na vakarau vakamau qori o Brother André Bjørnstad kei Sister Yasmin de Andrade Montelo. E kaya o Brother Bjørnstad ni rawa nira lomatarotarotaka eso na vuna rau vinakata kina me qarava ga e dua na Vakadinadina i Jiova na nodrau vakamau. E kaya: “Levu e bibi vei ira na nodra vakabauta. Ia ke vakatabui vei ira qori, ena rawa sara ga nira vakayalia na ka era kilai tani kina.”

Ni bera ni saga na matanitu o Norway me bokoca noda vakalawataki, sa tarova na nodra solia vei keda na ilavo ni veivuke. E dau soli tu vei keda qori me sivia e 30 na yabaki. E dau solia na matanitu na veivuke vakailavo ena sivia e 700 na matalotu e sa vakalawataki tu e Norway. Ena ika21 ni Tiseba 2022, eda kerea na iVakadinadina i Jiova ina mataveilewai me veisautaka na matanitu na nona vakatulewa me tarova na kena soli vei keda na veivuke vakailavo.

E cata na matanitu o Norway na noda vakabauta vakaivolatabu me baleta na veivakasivoi. E kaya mada ga keda vinakata meda vakalawataki tiko ga, meda veisautaka na noda ituvatuva ni veivakasivoi. Na veika e cakava qori na matanitu e sega ni yavutaki ena nodra ivakamacala na kenadau se na ka e vakataulewataka na mataveilewai.

E kaya na Kovana na kena sagai meda kua ni vakalawataki e sega ni vakaleqa na galala ni sokalou. Ia na mataveilewai na European Court of Human Rights sa vakatulewataka oti ena so na kisi e tautauvata kei na ka e via cakava o Norway me vakatabui na noda vakalawataki. E kaya ni qori e beci kina na noda dodonu ni sokalou na iVakadinadina i Jiova. a

O Brother Jørgen Pedersen, e lewe ni Komiti ni Tabana e Scandinavia, e kaya: “Era dau sokalou vata ena duavata na iVakadinadina i Jiova e Norway me sivia e 130 na yabaki. E taqomaki na noda dodonu kei na noda galala ena yavu ni vakavulewa e Norway. O koya gona, ena qai vaqaqacotaki ga qori ke vakadonuya na mataveilewai e Nona noda kerekere.”