26 OKOSITA, 2022
OSITERELIA

Sa Caka Oti na iMatai ni iWasewase ni iYaloyalo

SARAVA/ROGOCA

Ena ika12 ni Okosita 2022, e mai vakacavari kina na imatai ni iwasewase ni iyaloyalo, Na iTukutuku Vinaka i Jisu. Sa vakarau tekivu na kena ikarua ni iwasewase, qai vakacavari ena Okotova 2022.

Ena ika20 ni Me 2022, sa tekivu caka kina na imatai ni iwasewase ni iyaloyalo, ra qai vakayagataka na tacida na iyaya e tu ga e lomanivale. Gauna ya, e se waraki tiko na ka vakaivola me baleta eso na iyaya me vakarautaki kina na iyaloyalo ni gauna makawa. E mai vakaoti na veika vakaivola qori ena ika15 ni Julai, 2022. E vakadonuya sara na Tabana ni Tarataravaki ena Valenivolavola ni Tabana e Ositerelia, me ratou vakayagataka na vale kei na iyaya ni caka iyaloyalo na Tabana ni Vidio ena Dua na Wase kei Vuravura. Sa vakayagataki sara me tabaki kina na iyaloyalo qori.

Qo na vale e tiko kina na Tabana ni Vidio ena Dua na Wase kei Vuravura. E tiko kina na valenikuro, vanua ni kana, na ofisi, kei na vanua ni caka ulu kei na uku. Era maroroi ena bai qo na manumanu era laurai ena iyaloyalo

E sivia e le 500 na tacida mai Ositerelia kei Niusiladi era veivuke ena kena taravaki e sivia ni 7,000 na square meter ni vanua e caka kina na iyaloyalo. E kaya o Brother Russell Grygorcewicz e kodineita ni Komiti ni Tarataravaki: “Keitou sotava e levu na ituvaki dredre, ia keitou vakadinadinataka na nona veivuke o Jiova. E macala ni rawa ga qori ena veivuke ni nona yalo tabu.”

O Brother Ronald Curzan, e dauveivuke ena Komiti ni Veivakavulici. E tiko tale ga ena kena tabaki na imatai ni iwasewase ni iyaloyalo. E kaya: “E vakasakiti na nodra mamarau qai cakacaka vata na tacida era veivuke ena tarataravaki, kei ira na lewenivuvale e Peceli. Eda marau nida raica ni sa caka tiko na iyaloyalo ni oti e vica na yabaki na kena tuvanaki, qai taravaki. E veiuqeti dina na nodra veitokoni na mataveitacini ena yalava e qarava na valenivolavola ni tabana. Eda nuidei ni na tara na lomadra na tamata e vuravura raraba, na 18 na iwasewase ni iyaloyalo qo me baleta nona bula, kei na nona veivakavulici o Jisu.”

O Brother Kenneth Cook, e lewe ni iLawalawa Dauvakatulewa. A tiko e kea ena vica na siga e vakaoti tiko kina na imatai ni iwasewase ni iyaloyalo. E kaya: “Eda vakadinadinataka ni tokona tiko na Tamada Dauloloma o Jiova na cakacaka qo. Eda vakavinavinakataki koya kei ira kece era vakuai ira mera veivuke ena kena taravaki, qai tabaki na iyaloyalo qo. Meda masulaka ni na vukei ira e levu na vidio qo, mera muria voleka na ivakaraitaki i Jisu qai volekati Jiova.”