Dua na ka na tete ni kama e Ositerelia ni oti na vula i katakata kei na mamaca ni vanua. Tekivu ena Seviteba 2019, sa kama tiko e levu na veiyasa i Ositerelia. Qo e dua na kama vakadomobula me yaco ena veivanua qori. E kama vakalevu tiko na veibaravi kei na ceva ni yasayasa, Victoria kei New South Wales.

E sega ni dua na tacida e mate se mavoa, ia e levu nodra vale e kama, wili kina e ciwa na vale e kama yavu vakadua. Nikua, era sa tokitaki e sivia na le 700 na tacida. Levu vei ira qori era vakatulewataka mera biuta nodra itikotiko ena vuku ni kubou. Era kaya eso na kenadau ni ca duadua na kubou ni kama qo, e rawa tale ga ni vakavu leqa vei ira na lewenivanua. Levu vei ira na toki qori era sa lai tiko kei na nodra vuvale, itokani, kei na sota tale na dautukutuku ena ivavakoso voleka. E sega tale ga ni vakilai kina na kama.

E tauyavutaka na valenivolavola ni tabana e Ositerelia e rua na Komiti ni Vakacoko me vakarautaka na veika vakayago, me vakayaloqaqataki ira tale ga na mataveitacini. E rua na ivakatawa ni tabacakacaka kei na lewe ni Komiti ni Tabana, era sa veivakatawani qai veivakayaloqaqataki vei ira na tacida era vakaleqai. Era vakila na oca na tacida era vakaleqai ena kama qori, ia era vakavinavinakataka vakalevu na ivakaraitaki ni loloma vaKarisito era vakaraitaka tiko ga na tacida.—1 Pita 2:17.