Ena ika16 ni Okosita, 2019 era sevutaka na iVakadinadina i Jiova na New World Translation of the Holy Scriptures ena vosa vakaGuarani ena dua na soqo ni veiwasewase e kaburaki tiko e Peceli, e Capiatá, mai Paraguay. A sevutaka na iVolatabu ena imatai ni siga o Brother Daniel González, e lewe ni Komiti ni Tabana e Paraguay. Era sema tale ga yani e 13 tale na vanua ni soqo, era tiko kina na le 5,631 ena kena sevutaki na iVolatabu.

E levu e Paraguay era vosa vakaSipeni, ia e rauta na 90 na pasede era vosa vakaGuarani na vosa ni vanua qori. Na vanua duadua ga o Paraguay ena yasayasa vakaLatina era vosataka ga nodra vosanisucu.

E kaya e dua na tacida e veivuke ena vakadewa, ni levu na mataveitacini era masu vakaGuarani vei Jiova ni bera na vakadewa ni iVolatabu qo. E kaya: “Qo sa na vosa sara ga vakaGuarani vei keimami o Jiova. E lomani keimami dina o Jiova, e dokai keimami tale ga. Au sa qai volekati Jiova ga na Tamaqu.”

E macala ga ni na yaga vakalevu na iVolatabu vakaGuarani vei ira na le 4,934 na dautukutuku era vosataka na vosa qori e Paraguay. Ena uqeti ira mera vaqaqacotaka nodra lomani Jiova kei na nona isoqosoqo, ra vakavinavinakataki koya tale ga. Eda nuidei ni vakadewa qori e ganiti ira vinaka na dauwiliwili mera kila na talei ni nona nanuma na noda Kalou.—Same 139:17