Ena ika9 ni Okotova 2022, e sevutaka o Brother Paul Norton, e lewe ni Komiti ni Tabana e Peritania, na ivola The Bible—The Good News According to Matthew ena vosa vakaPunjabi (Shahmukhi). Era tiko ena porokaramu e sivia e le 1,300, wili kina na tacida era sema ena internet ena yalava e qarava na valenivolavola ni tabana e Peritania. Sa vakarautaki na iVolatabu qori ena kena e rogoci, iyaya vakalivaliva, kei na kena e tabaki.

Era vosataka na vosa vakaPunjabi e milioni na lewenivanua e Idia, Pakistan, kei na levu tale na vanua. Ena Okotova 2020, e sevutaki kina na New World Translation of the Holy Scriptures ena vosa vakaPunjabi, qai tabaki ena matanivola vakaGurmukhi. Ia na itabataba vou qo era na vakayagataka o ira na kila na vosa vakaPunjabi (Shahmukhi). Levu vei ira qori era sega ni rawa ni wilika, se vosataka na vosa vakaPunjabi (Gurmukhi). I liu, era dau wilika na iVolatabu ena so tale na vosa, me vaka na vosa vakaUrdu.

E veiyabaki e tabaki eso na ivola ena iVolatabu ena vosa vakaPunjabi (Shahmukhi). Ia na vakadewa qo ni ivola i Maciu, e rawarawa ni wiliki, e matata tale ga. Koya e bibi sara, e vakayagataki kina na yaca i Jiova.

E kaya e dua na daunivakadewa: “De dua e levu era sa rogoca na yaca i Jiova ena nodra sere ni lotu. Ia e dredre mera volekata na Kalou, ni levu na vakadewa sa kauta laivi na yaca i Jiova ena levu na tikinivolatabu. Ia na vakadewa ni iVolatabu qo, era na wilika sara ga na yaca ni Kalou ena vanua ga e dodonu me biu kina.”

Eda nuidei ni iVolatabu qo ena vukei ira na tacida mera toro voleka tiko ga vei Jiova, qai vakacaucautaka na yacana.—Maciu 6:9.