Ena ika17 ni Maji 2020, e tokona na Mataveilewai Levu e Igiladi kei Welesi na noda dodonu ni veivakasivoi nida muria na ivakatagedegede vakaivolatabu.

E kaya na Mataveilewai ni tu na dodonu vua na ivavakoso me kacivaka ni sa sega ni iVakadinadina i Jiova e dua, e sega ni kena inaki tale ga me rogorogo ca kina o koya e vakasivoi. E kaya na turaganilewa: “E sega ni ka vou vua e dua na lotu e muria na ivakatagedegede vakaivolatabu me vakasivoya e dua na lewe ni nona lotu. E dodonu ga me caka qori. Ke dua sa sega ni muria na ivakatagedegede vakaivolatabu, sa dodonu ga me vakasivoi mai na ilawalawa qori. Ke sega, ena rawa ni vakavuleqa vei ira na vo ni lewe ni lotu.”

E kerea o koya e vakasivoi me rogoci tale na nona kisi ena Mataveilewai Levu. E mani sega ni rogoci ni tukuna na Mataveilewai ni ‘sega na kena yavu vinaka, e donu vinaka tale ga na lewa a tau eliu, kei na veivakasivoi e caka ena ivavakoso.’

E kaya o Shane Brady na loya ni iVakadinadina i Jiova me baleta na vakatulewa qori: “E duavata kei na lewa e tau qo na mataveilewai e Igiladi kei Welesi, na Mataveilewai ni Dodonu ni Lewenivanua e Urope, na Mataveilewai Levu e Kenada, e Urope kei Merika. E vakadeitaki ena lewa kece qori ni dodonu vei ira na iVakadinadina i Jiova mera vakasivoya e dua ena isoqosoqo.”

Eda marau ni tokona na Mataveilewai na noda dodonu meda taqomaka na ivavakoso nida muria na ivakavuvuli vakaivolatabu.—1 Korinica 5:11; 2 Joni 9-11.