Ena imatai ni Me ina ika31 ni Okosita 2019, e tuvanaka na valenivolavola ni tabana na cakacaka vakavunau me wasei kina na itukutuku vakaivolatabu vei ira na vosa vakaAymara, qori e dua na vosa e vakayagataki Peru. E vuavuaivinaka dina na cakacaka, era veisoliyaka kina na tacida e 7,893 na ivola, e vakaraitaki tale ga vaka2,500 na vidio. Oti na cakacaka, e tauyavutaki rawa e 381 na vuli iVolatabu.

Era tiko e Peru e rauta ni 450,000 na lewenivanua era vosa vakaAymara, voleka ni 300,000 vei ira qori era tiko e Puno. Ena gauna qo e rauta ni le 331 na dautukutuku era vosa vakaAymara, e vitu na kena ivavakoso, e walu tale ga na kena iwasewase lalai. E lailai na dautukutuku e Peru ni vakatauvatani na yalava levu ni cakacaka vakavunau, era veitomani kina eso tale na dautukutuku mai Chile era vosa vakaAymara. Eso na gauna nira lai vunau na tacida era cabeta na ulunivanua e rauta ni 5,000 na mita na kena cere, qai batabata sara tu ga na draki.

Eso na tacida era gole me vica na aua, ena dua na taoni e caka toka kina na veibulu. Era mani wasea sara na inuinui e tu ena iVolatabu me baleti ira na mate. E vakavinavinakataki ira na tacida na vakailesilesi kei ratou na vuvale ratou lolosi tiko ena itukutuku veivakacegui ena iVolatabu.

Ena dua tale na vanua, ratou sotava na tacida e dua na ilawalawa era dau sota vakarua ena dua na macawa mera vulica na iVolatabu. Ratou raica na dautukutuku nira vakayagataka tiko na ivola Tamata Rogo Duadua me Bau Bula kei na Noqu iVola ni iTalanoa ena iVolatabu, e solia vei ira e dua na wekadra e vakaitikotiko mai Bolivia. Ena gauna era kila kina na ilawalawa qo ni vakarautaka na isoqosoqo na ivola qori, e levu tale ra via vulica na iVolatabu, era via soqoni tale ga.

E kaya o Brother Albert Condor, na qase ni ivavakoso e liutaka e dua na iwasewase era vakaitavi ena cakacaka lavotaki qori: “Keirau marau dina vakaveiwatini me keirau vakaitavi ena cakacaka lavotaki qo. E vaqaqacotaka neirau vakabauti Jiova ni keirau tekivu gole ena taoni, keirau sega ni kila na vanua e tiko kina, qai sega ni rawarawa na ilakolako qo. Ni keirau yaco yani, keirau masuti Jiova me vukei keirau me keirau raica e dua na vanua me keirau tiko kina. Io e sauma na neirau masu.E vakaukauataki au sara ga qori, kei na nodra nuitaki Jiova na tacida era vakaitavi ena cakacaka qo.”

Era marautaka na tacida nodra vakaitavi ena kena wasei na wai ni bula e yavutaki ena ka dina ena vosa ni Kalou, vei ira na vosa vakaAymara era tiko e Puno mai Peru.​—Vakatakila 22:17.